Nunarput nunarsuarmi nerisassaqartitsinermik qulakkeerisinnaasoq
Ujarassiooq kalaaleq Minik Rosing inuussutissarsiorneq pillugu ataatsimeersuarnermi Future Greenlandimi pingasunngornermi oqalugiarnermini tamanna oqarpoq.
Nunarsuami unammillernartunut iluarseeqataasinnaasunik nunatsinniittoqartoq, Minik Rosing oqalugiarnermini oqarpoq.
- Kalaallit Nunaat eqqarsaatigigaanni, nunalerinermut nunarsuarmi pingaaruteqarsinnaasutut siullertut eqqarsaatigineqaqqaartarunanngilaq, Minik Rosing oqarpoq.
AAMMA ATUARUK Future Greenlandimi oqalugiartussat piareertut
Sermersuarmiit nunaatilinnut
Sermersuarmili nunalerinermut iluaqutaasinnaasunik atortussiarpassuaqarpoq. Taakkuninngalu piiaanissaq nukippassuarnik atuiffiusariaqanngitsoq, Minik Rosing oqarpoq.
- Atortussiassat tamakkua sermimiittut tassaapput nunarsuarmi nunaatilippapilussuit issuutiminni amigaatigisaat pisariaqartilluinnagarisaallu.
Ujaqqat sermimit sequtserneqarsimasut pineqarput, taakkulu naggorissaataasinnaanersut maanna misiligarneqarput.
Naggorissaat nutaaq
Ujaqqat seqummakut qanoq sunniuttarnersut qanorlu kimittutiginersut maanna misilittarneqarpoq.
- Tamanna paasigutsigu, Kalaallit Nunaanni inussutissarsiutit eqqarsaatigineqarsimanngisaannartut aallartinneqarsinnaanissaat neriuutigaarput.
Suliniut Novo Nordisk Fondenimit tapersersorneqarpoq, ujarassiuutullu København Universitetimi professori, Minik Rosing naapertorlugu, naggorissaatinik ukiualunnguit qaangiuppata tunisassiaqalereersinnaassaaq.
- Neriuppugut ima ersaritsigisunik akissutisisimalissalluta, aappaagu ukiulluunniit marluk qaangiuppata akuersissutinik suliaqalereersinaalluta, tuniniaaneq siuarsalersimassallugu ingerlariaqqisimassallutalu,
Minik Rosing oqarpoq.
AAMMA ATUARUK Aningaasaliissutit tamanut iluaqutitaqassapput