Future Greenlandimi oqalugiartussat piareertut
GE taamaasilluni inuussutissarsiutit pillugit tallimassaa ataatsimeersuartitsissaaq. Future Greenland tassaavoq inuussutissarsiortut politikerillu assigiinngitsut naapeqatigiittarfiat, Kalaallit Nunaanni inuussutissarsiutitigut siunissami suliniutissat pillugit ataatsimeersuarnermi eqqartorneqartarlutik.
Danmarkip EU-mi kommissæriutitaa Margrethe Vestager Future Greenland 2017-imi oqalugiartussanut ilaasut ilaavoq, inuussutissarsiutitigut suliniutissat politikkimut qanoq ilanngunneqarsinnaanersut taassuma oqaluuserissavaa.
Margrethe Vestagerip saniatigut oqalugiartussanut ilaasut tassaapput Aningasaqarnermut Siunnersuisoqatigiit siulittaasuat Torben M. Andersen, Dansk Byggerimi pisortaaneq Lars Storr-Hansen, PensionDanmarkimi pisortaaneq Torben Möger Pedersen, Københavnip Universitetiani professori Minik Rosing, Naalakkersuisunilu siulittaasuusimasoq Kuupik Kleist, naalakkersuisunullu maanna siulittaasoq Kim Kielsen.
Future Greenland 2017 Nuummi maajip ulluisa qulingiluaanni ammarneqassaaq aqaguanilu maajip ulluisa qulinganni naammassineqassalluni. Inuit 450-it missaat Nunatsinneersut, Islandimeersut, Canadameersut Danmarkimeersullu ataatsimeersuarnermi peqataassapput, saqqummiussissallutik workshopertitsinernilu aamma peqataassallutik.
