Nunatta Qitornai namminiilivinnissamut ukiumik saqqummiusserusunngillat
Naak Vittus Qujaukitsup siornatigut nunatta namminersulivinnissaa sukannernerusumik anguniarneqassasoq oqaatiginikuugaluaraa, ukiumik aalajangersimasumik taaserusunngilaq.
- Imaanngitsoq naalagaaffinngornissarput nukingiutinnginnatsigu sulisoqassaaq sukkasuumik aamma oqartussaaffiit Danmarkiminngaanniit tigoorarneqarnissaat sukkasuumik anguniarlugu sulisoqarnera sukkatsittariaqarpoq aningaasallu tassani pisariaqartitatta nassaariniarnissaat pilertortumik aamma sulissutigisariaqarlugu, Nunatta Qitornaanik aallarniisoq Vittus Qujaukitsoq oqarpoq.
Partii Naleqqap nunatta 2021-mi namminiilivinnissaa Inatsisartunut qinersinermi pingaarnertut qineqqusaarutiginiarpaa. Nunattali 2021-mi naalagaaffinngornissaa piviusunngortikkuminaassinnaasoq, partiip siulittaasuata Hans Enoksenip KNR-imut nassuerutigaa.
AAMMA ATUARUK Nunatta 2021-mi naalagaaffinngornissaa piviusunngortikkuminaassinnaavoq
Vittus Qujaukitsulli ukiumik aalajangersimasumik taaserusunnginnini namminersulivinnissamut oqallinnermut ajoqutaasutut isiginngilaa.
- Uani qineqqusaarnitsinni uagut inuiaqatigiittut aaqqissugaanitsinni alloriarnissap tulliata pilinnginnarani pinngitsoornani kommunet iluarsartuunneqarnerat aammalu inuuniarnikkut atukkat oqilisaassiffigineqarnissaat pingaartutut isigivagut, Qujaukitsoq oqarpoq.
AAMMA ATUARUK IA aamma Siumut naligiipajaartut
Ullumikkut qinersisoqartuuppat Nunatta Qitornai 4,6 procentinik taaguunneqassagaluarpoq, taamaasillutillu Inatsisartuni ataatsimik isertitaqariaannaasut, HS Analysemeersut misissuinerisa takutippaat.
Misissuineq Aleqa Hammondip sassarnissani suli nalunaarutiginngikkaa saqqummiunneqarpoq.
Partii Naleraq ullumikkut qinersisoqartuuppat 10,6 procentimik taaguunneqassagaluartoq, aammattaaq HS Analysep saqqummiuppaa.
AAMMA ATUARUK Aleqa Nunatta Qitornai sinnerlugit sassarpoq