Aleqa Nunatta Qitornai sinnerlugit sassarpoq

Aleqa Hammond Nunatta Qitornai sinnerlugit Inatsisartunut qinigassanngortippoq. Tamanna ualermanna ataatsimut tusagassiortunut katersuutitsinermi nalunaarutigineqarpoq.

Aleqa Hammond partiimut sunniuteqarluarsinnaasoq politikeriusorlu pingaarutilik, Nunatta Qitornaani pilersitsisoq oqarpoq. 

Aleqa Hammond 2013-imi naalakkersuisut siulittaasuattut inissisimajunnaarpoq, aningaasanik 100.000 koruunit nalingannut atornerluisimasoq saqqummiunneqarmat. Tamannali Vittus Qujaukitsup akornutissartaqartinngilaa. 

- Uagut inoqatitsinnut aammalu qinikkanut allanut eqqartuussisutut inissisimanngilagut. Eqqartuussiviit tamanna suliassaraat, Vittus Qujaukitsoq KNR-imut oqarpoq.