Ilisimatuut nunatsinni pinerlunnermut tunngasunik misissuilersut

Nunatsinni pinerluttuliortarnermut tunngasut annertupput.

Pinerluttoqartarnera ukiuni kingullerni annertunerungaatsialernikuuvoq.

Politiit kisitsisaataat kingulliit naapertorlugit nakuusertoqarneranik nalunaarutiginninnerit siorna 1394-iupput, taakkulu ukiup siulianut sanilliullugit 49 procentimik amerleriarlutik. Tamatuma saniatigut kinguaassiutitigut naapertuilluanngitsuliornerit pillugit nalunaarutiginninnerit 207-imit 240-nut amerlipput.

Ilisimatuut nunatsinni inuit pinerlunnermut tunngatillugu qanoq paasinnittariaaseqarnersut maanna misissorniarpaat.

- Kalaallit Nunaanni pinerlunnernut tunngatillugu inuit paasinnittaasaat ilisimatusarfiginiarparput, taamaalilluta kinaassusersiorpalunngitsumik pinerlunnerit paasineqarsinnaalerniassammata. Soorlu pinerlunnernut tunngatillugu qanoq oqaluuserinneriaaseqarpugut? eqqartueriaaseq qanoq ittoq tusagassiutini atorneqartarpa? tassa imaappoq ataatsimut isigalugu qanorpiaq eqqartueriaaseqartoqartarpa?

AAMMA ATUARUK Politiit: Imigassartornerulerneq nakuusernerulernerlu ataqatigiikkunartut

Ilisimatuut tusagassiiviit assigiinngitsut pinerluttuliornermut tunngasunik qanoq oqaluuserinnittarnerat misissorniarpaat. Misissukkanik nutaarsiassaqartitsiviit, podcastit, atuakkat allallu ilaasinnaapput.

- Assersuutigalugu, Ilisimatusarfimmi pinerlunnermut tunngasut aalajangersimasumik periuseqarfigineqartarput, Qanoruumi nutaarsiassanilu aamma allaanerusumik periuseqarfigineqartarput aammalu eqqartuussiveqarfimmi allaanerusumik periuseqartarfigineqartarlutik, Anne Mette Hejlsted nassuiaavoq.

Taanna Ilimmarfimmi Oqaasilerinermi, Atuakkialerinermi Tusagassiutilerinermilu ilisimatuutut ilinniartitsisuuvoq, taassumalu allat ilisimatuut peqatigalugit pinerlunnernut tunngasut nunatsinni qanoq oqaloriaaseqarfigalutigillu paasisarnerigut misissuiffiginiarpaat.

Siunertaavorlu, tamatumunnga tunngatillugu nunanut issittunut allanut attaveqaatigiittoqassasoq, taamaalillugulu aamma nunarsuarmi ilisimatusarfiit allat akuutinneqassasut.

Anne Mette Hejlsted erseqqissaavoq, issittuni tamani pinerlunnerup ataasiinnaalluunniit erseqqissartarnissaa qanorlu ersiuteqarnerisa maluginiartarnissaat aammalu assigiinngitsukkaanik isiginnittaaseqarnerup ersersilluartarnissaasa pingaaruteqartoq.

AAMMA ATUARUK Inuartarneq podcastimik tusarnaagassiap pinaveersaartinniassavaa

- Tamakkununnga tunngasunik ullut tamaasa qanimut suliaqartut aammalu assigiinngitsutigut tamakkununnga tunngasunik unammillernarinnittut ilisimatuussutsikkut ilisimasatigut itisilerisinnaalerlutillu tunngaveqalersinnaalissapput, Anne Mette Hejlsted oqarpoq.

Ilisimatuut matumani misissussavaat pinerlunnermut tunngasut nunatsinni qanorpiaq paasineqarlutillu oqaluuserineqartarnersut.

- Atuakkialerinermik suliaqartuuvunga, uanga suliaqarfimma tungaanut tamanna isigissagaanni taava pinerluttulersaarummik atuakkiortoqarsinnaaagaluarpoq, taassumaluunniit qulequtaannaasigut eqqarsaatigigaanni qanoq isumassarsisoqarsinnaassagaluarpamita? Qarasaasiaq aqqutigalugu inuit naapittarfianni qanoq isummersortoqartarnera aamma maluginiarneqarsinnaavoq, taamaalilluni isiginnittaatsit arlalissuit sammivigineqarsinnaapput, Anne Mette Hejlsted oqarpoq.

Ilisimatuut misissuinermut peqataasussat aggustimi siullerpaamik naapissasut ataqatigiissaarisup oqaatigaa.