Inuartarneq podcastimik tusarnaagassiap pinaveersaartinniassavaa

Podcastimik tusarnaagassiaq Inuartoq by Sikkerninnguaq nunatsinni tiguaangaatsiarpoq.

"Qatanngutigigakkit siulliullutit aallaassavakkit". Podcastimi tusarnaagassiaq siulleq taama ateqarpoq. Tassani Narsami inunnik arfineq marlunnik inuarsimasoq oqaluttuarineqarpoq.

24-nik ukiulik Sikkerninnguaq Olsen kalaallinik inuarnikunik oqaluttuarinneqqiisuuvoq. Taanna nunaqarfimmit Upernaviup eqqaanniittumit Nuussuarmeersuuvoq.

Tusarnaagassiani maannamut arfiniliusuni siulleq apriilip 22-ani saqqummerpoq. Tusarnaagassiallu 28.000-eriarlugit tusarnaarneqareersimallutik.

Inuarnerup eqqartornissaa paquminarunnaarsarusuppaa

Sikkerninnguaq nunatsinni inuartoqartarneranik eqqartuinissaq paqumigineqarpallaartoq isumaqarpoq.

- Kalaallit Nunatsinni toqqoqqanermut, isertugaakanneramik qanoq toqutsisoqarnikuua, imaluunniit toqutsisoqarnikuusoq nalunngikkaluarlutigu ammasumik eqqartorneqarneq ajoramik Soorlu una sakkugalugu; kalaallit ikinnermut.

Sikkerninnguup tamanna allanngortikkusuppaa.

- Kisitsisit toqutsinerit qaffasittorujussuupput. Inuttussuseq apeqqutaatillugu toqutsinerit kisitsisit qaffasittorujussuupput nunarsuarmut allamut sanilliutissagaanni. Pinaveersaartitsinerit aallartittariaqalerput, Sikkerninnguaq oqarpoq.

2020-mi toqutsinerit tallimaapput toqutseriarnerillu arfineq marluullutik. Politiit ukiumut nalunaarsugaat taama takutitsipput.

Kulturikkut nukittorsaaneq killiligaananilu oqaaseqarsinnaaneq - ilaatigut Sikkerninnguup oqaassutigerusuppai.

Assersuutigalugu Sikkerninnguaq inuartarnermut pinaveersaartitseqataarusuppoq.

- Sillimaniarneq nalujunnaarpaat taava taamatut pisoqariarataarsinnaasoq assersuutigalugu toqutaasoqariaannaavoq taamaatut. Sillimanialerneq, uisanerulerneq.

- Eqqartuussivimmut tunniussaavutit

Oqaassutaali tusarnaartartut ilaasa paatsoorsimavaat. Tassami avoqqaarliuteqartoqartarsimasoq oqaluttuarpoq.

- Eqqunngitsumik pivutit, eqqunngitsorpassuit oqaatigivatit, kukkuvutit, inuttut malersuivutit. Soorlu ippassaq allaffigitippunga politiinut eqqartuussivimmullu tunniussaavutit, Sikkerninnguaq Olsen oqarpoq.

- Uannut annernarpoq, uanga inunnik malersuisuunnginnama. Uangaalluni eqqarsarnarpoq, ernumassanerlunga? Qanormita pineqarniarpunga?

Sikkerninnguaq ikinngutini unnussiuaaqatigitillugit inuarnilikkersaarutinik tusarnaagassiorusulersimavoq.

- Aappara kammalaatigullu pinerluttulikkersaarutinik tunngasunik toqutsinikunik oqaluttuaqattaaterujooratta, tusakkagut tamatta assigiinnginnamik.

Taamaalilluni Sikkerninnguaq pinerluttulikkersaarutinik kalaallinut tunngasunik saqqummiussisalerusulerpoq.

Nunaqarfimminngaanneeraannilu internettikkut attavilunneq takornartaanngilaq.

- Uploadileraanni immiussara immaqa 30 minutsit missaannik sivisussuseqartarpoq. Uploaderaanni 90 procentimullu pilluni internet ajortikkuni aallaqqaataaniit. Immaqa 1 time missaa ikkunniaruusaartarpara.