Corona tuniluutilissappat ullut qinersiviusut amerlanerit
Maannangaaq nunatsinni coronavirusimik tuniluuttoqanngilaq.
Coronavirus nunatsinni inoqarfinni kingusinnerpaamik apriilip aallaqqaataani
tuniluutilissagaluarpat, qinersinerit ulluni arlalinni ingerlanneqarnissaat, nunatta nakorsaaneqarfiata aalajangersinnaavaa.
- Ajutoortoqassagaluarpat, qinersinerullu nalaani coronalu tuniluutilerluni, aqunneqarsinnaanani tuniluutipiluuleraluarpat, qinersineq ulluni arlalinni ingerlanneqartariaqassasoq oqartussat aalajangersinnaapput, qinersinermut ataatsimiititaliamut allattoqarfimmi pisortaq, Klaus Georg Hansen oqarpoq.
Inoqarfinni 200-nit ikinnerusunik qinersisartulinni apriilip aallaqqataatinnagu tuniluuttoqalissagaluarpat qinersinerit ulluni marlunni, tassalu apriilip ulluisa tallimaani arfernanilu.
Coronalu inoqarfinni 200-nit amerlanerusunit qinersisartulinni tuniluutilissagaluarpat, taava inoqarfinni taakkunani qinersinerit ulluni pingasuni ingerlanneqassaaq, tassalu apriilip ulluisa sisamaaniit arferngata tungaanut.
AAMMA ATUARUK Ulloq aalajangerneqarpoq: Apriilip ulluisa arfernat qinersissaagut
Nunatsinni corona tuniluutilissagaluarpat qinersisartut ilaat, Inatsisartunut, Kommunalbestyrelsinut ilagiillu sinniisaannut poorskip nalaani qinerseratarsinnaapput.
- Aap nalunngilarput poorskip nalaaniittoq, isumatsialaanngitsorlu, kisianni periarfissaq tassa taanna periarfissatuaavoq. Arferngata kingorna ulluliinissatsinnut periarfissaqarsimanngilagut. Klaus Georg Hansen oqarpoq.
Allakkatigut qinersinissaq kaammattuut
Coronalu nunatsinni apriilip aallaqqaataata apriilillu arferngata akornanni tuniluutilissagaluarpat, nakorsaaneqarfillu allamik innersuussuteqanngippat, apriilip arfernganiinnaq qinersisoqassaaq.
AAMMA ATUARUK Sisimiuni inuit ullormi ataatsimi qinersisoqarnissaa pillugu: Qinersiartorutta tamaasa naammassissavagut
Coronali tuniluutilinngikkaluarpat, nappaatip nunarsuaq tamakkerlugu tuniluunnerani qinersissaagut.
Taamaammat qinersisartut sapinngisamik amerlanerpaat allakkatigut apriilip ulluisa arferngat sioqqullugu qinersinissaat, Klaus Georg Hansenip kaammattuutigaa.
