Issittoq allanngoriartorpoq: Paarnat tuttullu tatineqaraluttuinnarput

Ukiassariartulernerani pinngortitarsuarmi paarnat kigutaarnallu takornartaanngillat. Paarnalli taakku tatineqaraluttuinnarput, sullerngit paarnaqutinut pujoralatserisartut ikiliartormata.

Ilisimatuussutsikkut nalunaarusiaq nutaaq issittumi uumasunut naasunullu tunngasoq taama takutitsivoq. Issittumi nunanit assigiinngitsunit ilisimatusartartut 200-nit amerlanerusut nalunaarusiami suleqataapput.

AAMMA ATUARUK FN: Nunarsuaq kiatsikkiartupiloorpoq

- Sullerngit naasut kingunissaannik pujoralatserisarput, taamaalillutik naasut amerliartulersarput. Uagut pingaartipparput ukialerpat paarnaqarluarnissaa, silalu atorsaalluassappat kigutaarnaqarluarnissaa, Pinngortitaleriffimmi siunnersorti Christine Cuyler oqarpoq. Taanna nalunaarusiami misissueqataavoq.

Pujoralatserisartut ikiliartorput

- Sullernginilli pujoralatserisartoqanngippat paarnaqarsinnaanngilaq. Ukiami nuniattarneq sunnerneqarsinnaasoq, nalunaarusiami inuiaqatigiinnut soqutiginaataasa pingaarnerit ilagaat, Christine Cuyler oqarpoq. 

Sullerngit naasunut, soorlu paarnaqutinut, pujoralatserisartut ikiliartortut, nalunaarusiap ilaatigut takutippaa.

Naak suli paarnat kigutaarnallu nungukkiartulinngikkaluartut issittumi sullerngit pujoralatserisartut ikiliartupiloornerisa takutippaat siunissami paarnakinnerulersinnaasoq.

- Nalunaarusiami Kalaallit Nunaannut tunngasut arlaqarput. Soorlu uumasoqatigiit assigiinngitsut Kalaallit Nunaanniiginnartartut arlalissuit silap pissusiata allanngoriartupiloorneranik peqquteqartumik tatineqaraluttuinnarput.

- Ilaatigut sullerngit pingaaruteqaqisut naasut kingunissaannik pujoralatserisartut aammalu ilaatigut timmissanit nerineqartartut ikiliartulersimapput, Christine Cuyler oqarpoq.

Malinnaalluarnissaq pingaaruteqarpoq

Ilanngullugu erseqqissarpaa uumasut nerisareqatigiiaarneranni allannguutit uumasoqatigiiaallu assigiinngitsut nunatsinni pisuussutaasut qanoq sunnerneqarsinnaanerat malinnaaffigiuassallugu pingaaruteqartoq.

- Issittumi sila kissatsikkiartormat Kalaallit Nunaannut pingaaruteqarpoq paasisat tamakkua ilinniarfiginissaat. Issittumi paasisanik katersisarnerput assigiissartariaqassavarput. Taamaalilluta malinnaanissatsinnut periarfissaqarneruniassagatta, Christine Cuyler oqarpoq. 

AAMMA ATUARUK Ilisimatuut nassaartut: Sermersuarmut tunngatillugu nutaarsiassatsialaqarpoq

Assersuutigalugu Canadami tuttoqarfiit amerlasuut ikiliartorfiusut, nalunaarusiap takutippaa.

- Naak Kalaallit Nunaata kitaani tuttoqarfinni anginerni ikiliartorfiulersunik maluginiagaqanngikkaluarluta, Canadami Alaskamilu tuttut ikiliartupiloorput. Tamanna eqqummaariffigisariaqarparput, tassami Kalaallit Nunaanni taamaattoqannginnissaa anguniarniassagatsigu.

Canadami tuttunut eqquineruvoq 

Cuylerip erseqqissaatigaa tuttut ikiliartornerisa peqqutigigaat bakterissat toqqutaasartut nillataartumi nappaatigilerneqarsinnaaneq ajormata.

Silaannaalli kissatsikkiartornerani tamanna allanngorsimavoq. Bakteria nunamiissinnaavoq immamiissinnaalluniluunniit, soorlu aalisakkani, timmissani uumasuniluunniit allani.

Nappaat Canadami tuttunut umimmannullu eqquisimavoq.

- Tuttut ikiliartorujussuarput, Christine Cuyler oqarpoq nangillunilu:

- Kalaallit Nunaata kitaani tuttut ilaasa nappaatigilersimagaat aamma paasivarput. Nappaatillu tuniluutilinnginnissaa anguniarneqartariaqarpoq, kingunerlunnginniassammat.