Ilisimatuut nassaartut: Sermersuarmut tunngatillugu nutaarsiassatsialaqarpoq
Ilisimatuut Kalaallit Nunaata sermersuata ataani naasunik ujarannguussimasunik aatsaavissuaq nassaarput, Ilisimatusarfik Københavns Universitet tusagassiuutinut nalunaarummi paasissutissiivoq.
Ujarannguunnikut iluaqutigalugit, Kalaallit Nunaanni qangarsuaq silap qanoq issimaneranik paasissutissanik pissarfigineqarsinnaapput siunissamilu sermersuup qanoq ikkumaarneranik paasisaqarfigineqarsinnaallutik.
Niels Bohr Instituttemi professori, Dorthe Dahl-Jensen taama oqaluttuarpoq, taassuma suleqatini Belgiameersut USA-meersut peqatigalugit ujarannguunnikut nassaaraat.
- Sermimi ujarannguunnikunik nassaarneq soqutiginarluinnartuvoq. Naasunik ujarannguunnikunik allanngortinneqanngitsunik aatsaat siullermeertumik nassaarpugut, taanna oqarpoq.
AAMMA ATUARUK Sermersuup ataani taserujussuusimasoq nassaarineqartoq
Sermimineq sermimik ruujoritut ittuuvoq taannalu 10 centimeterit missaannik silissuseqarpoq. Qillerinermi amitsukujuutut qaqinneqartarput. Taamaalilluni sermersuup ataanit ujarannguussimasut pissarsiarineqarlutik.
Sermit sermersuaq pillugu apeqqummut qitiusumut ilisimasaqarnerulernissamut atorneqarsinnaapput.
- Sermit misissorneranni ujarannguussimasut – tassa avalequtit pilutallu ilaat mikisut toqqaannartumik takusinnaavagut – taakkulu Kalaallit Nunaata sermimit qallerneqannginnerani naasoqarsimaneranut takussutissiipput, Dorthe Dahl-Jensen oqarpoq.
- Taamaalillutik sermeqannginnerani qanoq kiatsigisimanersoq minnerunngitsumillu sermeqalinnginnerani Kalaallit Nunaanni suut naasinnaanersut annerusumik paasisaqarfiginissaannut periarfissiipput.
Ilisimatusarfiup Københavns Universitetip ujarannguunnikut sermimiittut ukiuni 20-ni toqqorsivimmiitsippai, taakkulu Sermersuarmi 1964-imi siullerpaamik qillerisoqarneranit tigusaallutik.
Taamanikkulli ilisimatuussutsikkut suleriaatsit ullumikkornit aallaanerusimammata, sermeq piiarneqartoq annerusumik misissuiffigineqarsimanngilaq.
Sermit karsimiitinneqarlutik ammarneqarsimanngitsut 2017-mi nuussuinermi paasineqarput, Dorthe Dahl-Jensen oqarpoq.