Eva Aariak - Nunavummi arnani siullersaalluni naalakkersuisunut siulittasunngorpoq
Qaammat ataasiinnaq qaangiuppoq Nunavumi politikerit ilisimaneqarnersaasa ilaat, Leona Aglukkaq, Canada tamakkerlugu inatsisartuni ilaasortanngormat.
Taannaannaanngilarli, statsminister Stephen Harperip aamma peqqinnissamut ministerinngortimmagu, Canadami inuit akornanni Canada tamakkerlugu naalakkersuisuni ilaasortani siulliulluni.
Aamma Arnaq alla, Eva Aariak, Nunavumi naalakkersuisunut siulittaasunngorpoq, naalakkersuisuni arnartatuaalluni.
Taama pisoqarnera inuppassuarnit nuannaarutigineqarpoq. Nunavumi innuttaasut radiukkut internetsikkulluunniit oqarput, USA –misulli allannguinissamut piffissanngortoq. Aamma oqarput, arnaq naalakkersuisuni siulittaasutut tusarnaallaqqinnerussasoq; inuuniarnikkut ajornartorsiutinik ulluinnarnilu ajornartorsiutinik paasinnilluarsinnaanerussasoq; Nunavumi naalakkersuisuusartunut allanut naleqqiulluni innuttaasunut attaviuminarnerussasoq;
Allatut oqaatigalugu, innuttaasut Eva Aariak-mik qinersineq oqaluttuarisaanermi malunnaateqartutut isigaat.
Canadami inuit arnartaat arlallit siuttooreerput. Soorlu Mary Simon, inuit Canadami kattuffissuanni, Inuit Tapiriit Kanatami, siulittaasuusoq, aamma Sheila Watt- Cloutier, silap allanngoriartornera pillugu suliniarneranik eqqissinermut suliniartunut Nobel-ip nersornaasiuttagaanut siorna innersuunneqartoq.
Eva Aariak naalakkersuisuni siulittaasuunermi saniatigut naalakkersuisunut allanut attaveqarnissamut akisussaasuussaaq aammalu arnat atugaannut tunngasunik suliaqassalluni.
