EU-p puisit amii pillugit inerteqquteqarnera kingunerluuteqartoq
EU-p puisit amiinik nioqquteqarnissamut inerteqquteqarnermigut nunap inoqqaavisa pisinnaatitaaffii unioqqutippai, naggueqatigiillu inuit puisittaannit ammit nioqqutigineqaannarsinnaanerannik tamanut paasissutissiinissamut akisussaaffini nammassinagu.
Marie Yvonne Rasmussenip University of Montellierimi masteriliamini inerniliinerisa ilaat taamaappoq.
EU uumasut atugarissaarnissaannik tunngavilersorluni puisit amiinik eqqussuinissamut nioqquteqarnissamullu 2008-mi inerteqquteqalerpoq. Uumasut atugarissaarnissaannik illersuiniaqatigiit assilialianik ilaatigut takutitsisarlutik puisit piaraannik anaattamik toqoraasarnermut ukiuni arlalinni akerliulersitsiniareersut taama inerteqqusiorput.
AAMMA ATUARUK Europaparlamentimut ilaasortaq: Puisinik eqqusseqqusinnginnerup atorunnaarsinnissaa ajornukusuussaaq
EU-p naggueqatigiit inuit illersunngikkai
Marie Yvonne Rasmussenip inerteqquteqarnerup naggueqatigiinnut inunnut kingunerluutaat masteriliamini sammivaa.
- Masterilianni inerniliininni EU-mit nunat inoqqaavisa EU-mut attuumassuteqartumi najugaqartut illersorneqarnerisa iluatsinneqannginnera pingaarnerpaavoq, uanilu puisit amii pillugit inatsit assersuutissatsialaavoq pissutigalugu, inatsit naggueqatigiinnut inunnut puisinniartarnermullu atatillugu akornutissarpassualiimmat, Marie Yvonne Rasmussen oqarpoq.
AAMMA ATUARUK Kraftig canadisk reaktion på sælforbud
Inerteqquteqalernermili puisit ammii, naggueqatigiit inuit pisaanneersut pineqannginnissaat aallaqqaammulli isumagineqarpoq, tamannali iluaqutaanngilaq, allaaserinnittoq isumaqarpoq. Taanna masteriliamini ima inerniliivoq:
- EU-p nunap inuiinik, EU-mi najugaqartunik, naggueqatigiit inuit ilanngullugit illersuinera iluatsinngitsoq, kisiannili aamma EU-p nammineq inatsisiliani allatamisulli aamma atuutsilinngikkaa, Marie Yvonne Rasmussen oqarpoq.
Naggueqatigiinneersut akuerisaanerat pillugu EU paasissutissiilluartussaagaluartoq
EU naggueqatigiit inuit piniartarnerat, piorsarsimassusiat inooriaasiallu pillugu paasisitsiniaassasoq, inatsimmut ilaatillugu allanneqarpoq, taamaalillunimi puisit amiinik piserusuttut ammit naggueqatigiinnit inunneersut akuerisaanerat pillugu paasitinneqarsinnaassammata.
AAMMA ATUARUK Aggressive dyreværnsorganisationer banede vejen for sælforbud
Qaammarsaanerli taanna aallartinneqanngisaannarpoq, taamaalillunilu inatsit Marie Yvonne Rasmussen naapertorlugu naggueqatigiit inuit aningaasarsiornerisa ineriartornissaanut periarfissanik ajornerulersitsivoq, naak ilaatinneqannginnissaanik malittarisassaqaraluartoq. Tamannalu nunap inoqqaavisa pisinnaatitaaffiinik unioqqutitsinermut qanittuusoq, allaaserinnittoq isumaqarpoq.
Taassuma masteriliornermigut EU-p allaffissuini pissaanillit ajornartorsiummut uisikkusuppai.
- Inatsisip uuma atuutsilerneqarnerata kinguneratigut isiginianngisani kingunerluttoqartoq, EU-mi politikerinit allanillu amerlanerusunit paasineqarsinnaasuuppat qujanassaqaaq, oqarpoq itisiliillunilu:
- EU-p inatsit naggueqatigiinnut inunnut iluaqutaasinnaasunngorlugu allanngortissagaa, inatsimmilu qaammarsaanissamik siunertartik immaqa ilungersuutiginerussagaat siunissamut neriuutigaara, Marie Yvonne Rasmussen oqarpoq.
EU-Kommissionip inatsip atuutsilerneqarnera taassumalu kingunerisaanik naliliinermut nalunaarusiaq 2019-imi decembarimi kingusinnerpaamik tunniuttussaavaa, Marie Yvonne Rasmussenillu masteriliani naliliinermut ilaatinneqarnissaa neriuutigaa.
AAMMA ATUARUK KNAPK kræver erstatning fra EU for sælforbud
