Europaparlamentimut ilaasortaq: Puisinik eqqusseqqusinnginnerup atorunnaarsinnissaa ajornukusuussaaq
Christel Schaldemose eqqusseqqusinnginnermik akuerseqataasimasut ilagaat. Taassumali ullumi nassuerutigaa taamatut aalajangersaasoqarsimanera siunertaineqartoq malillugu ingerlarsimanngitsoq.
-Puisinit nioqqutissianik eqqusseqqusinnginnerup atorunnaarsinneqarnissaanik Kalaallit Nunaat kissaateqartoq nalunngilara. Unneqqarillungali oqassaguma, taamatut pisoqassasorinngilara, EU-mimi suleqatigiinnerup iluani taamaaliortoqarusuttoqarpasinngilaq.
Nunarsuarmi niueqatigiit kattuffissuat WTO novembarip 25-iani aalajangiivoq naggueqatigiit Inuit eqqusseqqusinnginnermut ilaatinneqannginneri WTO-p aalajangersagaanut naapertuutinngitsoq, tamannalu Kalaallit Nunaata puisit amiinik EU-mut siunissami eqqussisinnaaneranik nalornisitsilerpoq. Christel Schaldemosep taamatut aalajangiisoqarsimanera uggoraa:
-WTO-p taamatut aalajangiinera EU-Kommissionimut misissoqquniarpara. Kommissionimut nalilersoqqussavara qanoq inissisimanersugut, Inuimmi eqqusseqqusinnginnermut ilaatinneqannginnissaanik immikkut aalajangersaanitsinni puisit amiinik Kalaallit Nunaanneersunik Europami niuerfinnut nioqquteqartoqarsinnaanissaa siunertaraarput.
Aamma eqqusseqqusinnginnerup atorunnaarsinnissaa Kalaallit Nunaannut aaqqiissutissatut pitsaanerpaajussasorinngilaa.
-Eqqusseqqusiunnaarnissaq amerlasuunit taperserneqarpoq, inuppassuimmi puiseeqqat puisillu piniarneqartut ingerlaannaq toqunneqaratik naalliutsinneqartartut assilineqarneri takusimavaat. EU-mi taperserneqarneq annertuupilussuuvoq, eqqusseqqusinnginnerlu attatiinnarneqarsinnaanngippat taava isumaqarpunga puisit amiinik akerliusut allatut periaaseqarlutik suliniuteqarumaartut. Europami puisit amiinik, aamma Kalaallit Nunaanneersunik, nioqquteqaannarnissaq anguniarlugu aaqqiissutissanik nassaarniarutta pitsaanerussasoraara.
Europaparlamentimi ilaasortat 550-it 2008-mi peqqussummik akuersisut ilagiinnaraluaraanni, peqqussut allaanerusumik ilusilersorneqartariaqaraluartutut ullumikkut isumaqarfigaa.
-Piniariaatsit matumani pingaaruteqarluinnarput. Uumasut naalliutsinneqassanngillat. Puisi aallaallugu ingerlaannaq toqunneqarpat, uanga ajoriffissaqartissanngilara. Immaqa tamanna isiginiarnerusariaqarparput - puisit amii pillugit akerlilersuisoqarani uumasunik atugarissaartitsinissaq pineqarluni. Puisimmi amiinik tunisassiorneq piujuaannartitsinissamik tunngaveqarluni ingerlanneqartoq eqqorneqarpoq, tamannalu siunertaanngikkaluarpoq, pingaartumik uanga tunginnit.
