Canada WTO-mut suliassanngortitsiniarpoq
Puisit amiinik nioqqutissanillu puisinit pisunit EU-p inerteqquteqalernera Canadami assigiinngitsunit erniinnaartumik periarfigineqarpoq. Puisinniarneq Canadami Inuinnarniunngitsoq aammali Canadap kangisinnerusortaani Paggivittami piniarnermik inuutsissarsiuteqartunit amerlasuunit isertitaqarfiusarpoq pingaaruteqarluartoq. Puisit amiinik tunisaqarnermut inerteqquteqarneq Inuit pisaannut attuumassuteqanngikkaluartoq taamaattoq akit appariarujussuareerput. Tamanna Inunnut Paggivittarmiunullu annaasaqaataaqaaq.
Taamaammanuna erniinnaartumik periartoqartoq. Canadami aalisarnermut ministerip, Gail Sheap, tusagassiuutinut oqarnera naapertorlugu piviusut aallaaviginagit misigissutsilli aallaavigalugit aalajangertoqarpoq taamaammallu tamanna nunarsuarmi niueqatigiinnermi suliniaqatigiiffimmut ingerlateqqinniaritsik. Aalajangerneq ilisimatuussutsikkut misissuinerit tunngavigalugit pisimasoq oqaatigineqaraluarpoq, Canadamili ministerip oqaatigaa Canadami misissuinerit taamaattut allatorluinnaq takutitsisut tamannalu EU-mi eqqumaffigineqartariaqartoq.
Canadami ICC-mut præsidentip tullersortaa, Violet Ford, oqarpoq Inuit Ruslandimeersut, Alaskameersut, Canadameersut Kalaallit Nunaanneersuullu EU-p inerteqquteqalerneranut ataatsimoorlutik akerliusut.
Misigitsaatsuliorluni aalajangerneruvoq, Mary Simon, Inuit Tapiriit Kanadami præsidenti oqarpoq. Canadami naalakkersuisut erniinnaartumik sakkortuumillu periarnerat nuannaarutigeqaara. EU-p suliniaqatigiiffiit uungaannaq isigisut pillugit niueqateqarnikkut nammineq maleruagassiaminik saneqqutsiinnarnera paasiuminaappoq. Ulloq alianaqaaq taamaakkaluartorli Inuit puisinniartarnertik ingerlatiinnarumaarpaat. EU-mi naalakkersuinermik suliallit kukkunertik paasilerumaaraat neriuutigiinnarsinnaavara, Mary Simon oqarpoq.
