Eqqagassat illoqarfinni annerni ikuallanneqartalissasut
Eqqagassanut ikuallaavinnut akuerisanut eqqakkat nassiunneqartalernissaat kommuninit kissaatigineqarput. Naalakkersuisullu kissaatigineqartumut tapersiipput, taamaammat eqqagassat assartuunneqartalernissaannut 13,5 millionit koruuninik aningaasaliipput. Sumiiffiit pineqartut tassaapput Kangaatsiaq, Qasigiannguit, Aasiaat, Uummannaq, Upernavik, Kulusuk, Kuummiut Kommune Kujallermilu nunaqarfiit ilaat.
Naalakkersuisunit aningaasaliisoqarnera Avannaata Kommuniani teknikkimut imikkoortortami pisortap Niels Pedersenip naammagisimaarpaa.
- Kommunip iluani suliassat kisitta kivissinnaannginnatsigu taama neriorsuisoqarnera assut nuannaarutigaarput, Niels Pedersen oqarpoq.
AAMMA ATUARUK Ikuallaanermit pujoq peqqissutsimut ajoqutaaqisoq
Uummannap ikuallaaviani eqqakkanik ikuallaasoqarnerani qaammatialuit qaangiuttut ajornartoortoqarpoq. Taamaalisoqaqqinnginnissaalu siunertaralugu atortunik nutaanik misileraatissanik piniartoqarsimasoq Niels Pedersenip oqaatigaa.
- Atortunik nutaanik pisiniarnissatsinnut aningaasaliiffigineqarpugut. Eqqakkat poortoriarlugit silaannaarlugit nassiuteriaannanngorlugit suliarineqartalernissaannut atortorissaarutit. Misileraanermullu inummik ataatsimik atorfinitsitsinissatsinnut ukiumi ataatsimi aningaasaliisoqarluni.
AAMMA ATUARUK Uummannami eqqaavissuaq ulorianartumik pujuliortoq
Eqqakkat assartorneqartalernissaannut aningaasaliinerup saniatigut Kommuneqarfik Sermersuumi nunaminertat oliamik mingutsinneqarsimasut salinneqarnissaannut misileraanissamut aamma aningaasaliiffigineqarpoq. Taakkulu saniatigut Qeqqata Kommuniani Sisimiuni eqqakkat qanoq suliarineqartarnissaannut aningaasaliisoqarluni.
Eqqakkat suliarineqartarnera aaqqiiviginiarlugit kommunit ataatsimut 4,5 millionit koruuninik Naalakkersuisut immikkoortitsivigaat. Aningaasaliissutit ataatsimut ikuallaaveqalertoqarsinnaaneranik misissuinermut ilaatigut atorneqassallutik.
AAMMA ATUARUK Uummannami eqqaavissuaq ikuallakkunnaangajalertoq
