Assi: Franz Petersen

Uummannami eqqaavissuaq ikuallakkunnaangajalertoq

Uummannami eqqaavissuaq ikuallakkunnaangajalertoq pujorpallaarunnaarsimasorlu, Uummannami najugalik oqaluttuarpoq.

Uummannami eqqaavissuaq ulikkaaqqasoq pingasunngormat ikuallappoq, ulorianartumillu pujuliorluni.

Maannali ikuallakkunnaalersoq illoqarfimmi najugalik oqarpoq.

- Massakkut ajunngilaq. Qamingajalerpoq. Qujanartumik pujukillinikuuvoq, Uummannami takornarialerisoq namminersortoq, Paaluk Kreutzmann, nalunaaqutaq aqqaninngungajalersoq oqarpoq.

Anorili unnuaq saqimmat illoqarfimmut pujulersimasoq taanna oqarpoq.

- Unnukkiartornerani anoraa saqikkami assarnilerami taava pujorsuaq illoqarfitta tungaannaanut tingikkami. Taava illoqarfik tamangajaat pujulersikkaluarpaa, allaat illup iluani naamaneqarsinnaalluni, Paaluk Kreutzmann oqarpoq.

Uummannami eqqaavissuaq

Naak Uummannaq illoqarfiugaluartoq 1.300-t sinnerlugit inulik eqqakkanik ikuallaasarfeqanngilaq. Eqqakkanillu ikuallaanissamut immikkut akuersissuteqartoqanngimmat, eqqakkat eqqaavissuarmi ukiup ataatsip ingerlanerani amerliartuinnarsimapput.

Paaluk Kreutzmannillu ikuallaaviliortoqarnissaa neriuutigaa.

- Sanasoqassasoq neriunnaraluarpoq. Makkua eqqakkat anorlernerani sumut tamaanga teqqartarput.

- Taavalu ikuallaanerit tamangajaasa anorip allanngorneratigut pujoq illoqarfimmut teqqartarami, taavalu imeqarfipput pavani qaqqamiilluni. Tassa pujoq aamma tungaannaanut ingerlasarpoq, Paaluk Kreutzmann oqarpoq.

KNR-ip Nukissiorfiit attaveqarfigai, imeqarfimmilu ajornartorsiuteqarnersoq maanna misissorneqartoq ingerlatseqatigiiffiup paasissutissiissutigaa.

Avannaata Kommuniani teknikkikkut ingerlatsivimmi pisortaq, Nick Nielsen, naapertorlugu, kommunalbestyrelsi eqqakkat Upernavimmit Uummannamiillu assartorneqarnissaannut aningaasanik Namminersorlutik Oqartussanut qinnuteqareerput.

Kommunip nammineerluni suliamut 1 millionit koruuninik immikkoortereerpai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat