Video: Uummannami eqqaavissuaq ulorianartumik pujuliortoq
Uummannami eqqaamavissuaq ikuallappoq ikuallanneratalu pujua peqqissutsimut ulorinartoq, Avannaata Kommuniata teknikkeqarnermut pisortaata, Nick Nielsenip ilisimatitsissutigaa:
- Pujornera peqqissutsimut ulorianarpoq. Kissarnera annikilluni ikuallappoq, pujorneratigullu dioxinit saffiugassallu oqimaatsut akui siammaaterneqarput, taamaammat innuttaasut pujoq ingalassimaarniarsarissariaqarpaat, Nick Nielsen oqarpoq.
Kommunip ingerlatsivimmiittut oqaloqatigisarneraisigut ikuallanneq malinnaavigigaa, taassuma ilisimatitsissutigaa:
- Taamaammat qanoq iliuuseqarnissarput nalilersortarparput. Qamissinnaavarput. Kisianni ikeqqippammi, Nick Nielsen oqarpoq, neriuutigaalu pujoq anorimit illoqarfimmit ningortinneqassasoq.
Nielsen: Eqqaavissuaq nammineerluni ikuallalersoq
Nick Nielsenip eqqaavissuarmi eqqagassat piffissami sivisuumi amerliartuinnarsimanerat pissutigalugu eqqagassat nammineq ikuallalersimanerarpai.
Kommunip eqqagassat nakkutigisaasumik ikinneqarsinnaanerat siorna qinnuteqaatigaa akuerineqarlunilu, taamaakkaluartorli ulapputtoqarnera Karrat Kangerluannilu ajunaarnersuaqarnerata kingorna inuppassuaqalernera pissutigalugu eqqagassat amerliartuinnarsimapput:
- Immikkut akuerineqarnerup nalaani ulapputtoqangaatsiarpoq, taamaammat annikitsuinnarnik ikuallaasoqarpoq, isumalluutillu allamut atorneqarlutik, Nick Nielsen oqarpoq.
Taamaammat Avannaata Kommunia eqqaavissuarmi nakkutigisamik ikuallaanissamut Naalakkersuisunit immikkut akuerineqarnissamik qinnuteqarpoq, qinersisoqarnerali pissutigalugu immikkut akuersissuteqarfigineqarnissaq iluatsissimanani, Nick Nielsen oqarpoq.
