Ilisimatooq: Ikuallaanermit pujoq peqqissutsimut ajoqutaaqisoq
- Kalaallit Nunaat silaannaqartorujussuugaluartoq, imaalu annertoorujussuugaluartoq, ulorianartunik peqqissutsimullu akornutaasinnaasoqarpoq, civilingeniøri nunatsinnilu eqqakkanik suliaqarnermut ph.d-lik Rasmus Eisted oqarpoq.
Uummannami eqqaavissuaq qanittukkut ikuallappoq, assinganillu eqqaavissuarni nakkutigineqanngitsumik ikuallattoqaraangat akunnakusoornartortaqartartoq, Eisted nassuiaavoq:
- Ikuallanneq qanoq ilteqartiginersoq, suut ikuallannersut, qanoq kissassuseqarnersoq imaluunniit suna alla aqunneqarsinnaaneq ajorput. Tassalu ikuallannerit aqunneqarsinnaanngillat, taamaammallu pujuliortorujussuusinnaasarput.
Pujumilu akut peqqissutsimut ajoqutaasinnaasut anorimit siaruaanneqartarput.
Kræfteqalersitsisinnaasut
- Immaqalu siusinnerusukkut taamaaliortoqartaraluartoq, siaruaaffigisinnaasaallu annertoorujussuugaluartoq, taava akut ulorianarput. Dioxiniusinnaavoq, saffiugassat oqimaatsuusinnaapput, akoorutissaasinnaapput kræfteqalersitsisinnaasut inunnulluunniit allatut ajoqutaasinnaasut.
Rasmus Eisted oqarpoq, nangillunilu.
- Taava eqqaavissuarmi ikuallaasoqaraangat, putsup avatangiisinut siaruaannera sunniuteqartarpoq.
AAMMA ATUARUK Uummannami eqqaavissuaq ikuallakkunnaangajalertoq
Eqqaavissuarni ikuallannernit nakkutigineqanngitsunit putsup akui akornutaasorujussuusinnaapput:
- Putsup qanoq akoqartiginera ilisimanngilara, pujorli akoqarluarpat, taava saffiugassat oqimaatsut ilaat malussarniutinik ajoqusiisinnaapput naarmiunillu ajoqusiisinnaallutik.
- Dioxin kræfteqalersitsisinnaavoq allatigullu sunniuteqarsinnaalluni. Taamaammat putsumit sunnerneqangaatsiarneq napparsimalissutaasinnaavoq, Rasmus Eisted oqarpoq.
