Enhedslistenip maannakkut utoqqatsertoqaqqugaa

Statsministerip Mette Frederiksenip (S) kalaallit meerartaannut misileraatigineqarsimasunut 22-nut piaarnerpaamik utoqqatsissuteqarnissaa, danskit naalakkersuisuini illuatungiliuttup, Enhedslistenip piumasaqaatigaa.
juulip 11-at 2019 11:40
Nutserisoq Connie Fontain

 Nutaarsiassaqartitsivik Nordjyske Medier taama allaaserisaqarpoq.

- Neriorsuutigisani kinguarsarnagu eqquutsissavaa, Enhedslistenip Nunatsinnut tunngasunik oqaaseqartartua, Christian Juhl oqarpoq.

Mette Frederiksenip kalaallit meeqqat misileraatigineqarlutik 1951-imi Danmarkiliartinneqartut pisortatigoortumik utoqqatserfiginiarlugit, danskit naalakkersuisui nutaat inissitsinngitsiartut statsministeritut suliassamini siulliit ilagigaat oqaatigaa.

AAMMA ATUARUK Meeqqat misileraatigineqartut utoqqatserfigineqarnissartik utaqqeqqaartariaqassavaat

Aammattaaq inuppaaluit allat 1950-ikkunni 60-ikkunnilu meeraanerminni danskit meeqqanut angerlarsimaffiutaanni nakuuserfigineqartarsimasut naalagaaffimmit utoqqatserfigineqassasut oqaatigaa.

Kalaallilli meeqqat 22-t utoqqatserfigineqarsinnaanissaat suliap tamaata siusinnerpaamik aappaagu aasami naammassinissaanut utaqqissunneqarnissaa statsministerip, Mette Frederiksenip kissaatigaa.

Enhedslistenilli tamanna ajunngissorinngilaa. Inuit Ataqatigiinnit Folketingimut ilaasortap aamma tamanna isornartorsiorpaa.

AAMMA ATUARUK Meeqqanut misiligutaasunut utoqqatsernissap kinguartinnera kukkuneruvoq

Isumaginninnermut naalakkersuisup, Martha Abelsenip (S) utoqqatsertoqarnissaa maannakkuusariaqannginnerarlugu, KNR-imut oqaatigaa.

- Massakkut utoqqatserfigineqannginnissaat ajorinngilara. Nassuiaaneq aallartinneqareerpoq, aatsaallu naammassineqarpat utoqqatserneq pisinnaalissaaq, Martha Abelsen oqarpoq.

AAMMA ATUARUK Undskyldning eller ej: Sagen skal stadig undersøges