Dundas Titanium: Piniartut unnuisinnaallutillu tunitsisinnaassapput
![](/sites/default/files/styles/image_934x467/public/dsc03370.jpg?itok=VXUn25MB)
Dundas Titanium A/S-ip ingerlatseqatigiiffiup Moriusami sissami ilmenitinik piiaasinnaanissaannut akuersissut ippassaq atsiorpaa.
Aatsitassarsiutileqatigiiffik Moriusami 64 kvadratkilometerinik annertussusilimmi piiaasinnaanissamut akuersissuteqarfiuvoq, tassanilu ilmenitsinik titaniumiliornermut atorneqartartunik ukiuni 30-ni piiaasinnaatitaalluni.
Tamanna pisortaanerup, Hans Jensenip ingerlatsinermilu pisortap, Bo Stensgaardip soorunami nuannaarutigaat.
Moriusami aatsitassarsiorneq
Dundas Titanium A/S kalaallit piginneqatigiiffigaat allamit aqutaq, ingerlatseqatigiiffimmut piginnittuusoq Bluejay Miningimik ateqarpoq Tuluit Nunaanneerlunilu.
Aatsitassarsiutileqatigiiffik Moriusami 64 kvadratkilometerinik annertussusilimmi piiaasinnaanissamut akuersissuteqarfiuvoq. Moriusaq Qaanaap Savissiviullu akornanniippoq
Ingerlatseqatigiiffik aatsitassanik oqimaatsunik soorlu ilmenitinik titaniumiliornermut atorneqartartunik tassani piiaassaaq.
Piiaanissamut akuersissut decembarip ulluisa 14-iannit ukiunut 30-nut atuuppoq.
Ingerlatseqatigiiffiup piiaanissaanut matunissaanullu pilersaarut maanna amigaatigaa.
Pilersaarummi tassani aatsitassarsiornerup qanoq ingerlanissaa ilaatigut annikitsortalersorlugu nassuiaatigineqassaaq. Ingerlatseqatigiiffik pilersaarutinik Naalakkersuisunit akuersititsinissamut 2022-mi decembarip ulluisa 31-ata tungaanut periarfissaqarpoq.
Ingerlatseqatigiiffiup aatsitassarsiornermik suliaqarnini kingusinnerpaamik 2025-mi decembarip ulluisa 31-anni aallartissimassavaa.
- Akuersissut una suliniummut pingaarluinnartoq isumaqartorujussuuvoq. Ukiut tallimat arfinillit missaanni pingaartumillu ukiuni kingullerni pingasuni suliaqarpugut, ingerlatsinermut pisortaq, Bo Stensgaard oqarpoq.
- Akuersissuteqarfigineqarnikkut aningaasaliiffigineqarsinnaalerpugut sanaartornerlu inissillugu.
Ingerlatseqatigiiffiup aningaasaliisoqarnissaanut periarfissat sisamat tallimalluunniit naatsorusuutigai – tamannali maanna saqqummiunneqassanngilaq.
- Qanoq angusaqarsimatiginerluta oqaatigissallugu siusippallaarpoq, ingerlatsinermut pisortaq oqarpoq.
AAMMA ATUARUK Aatsitassarsiornissamut isumaqatigiissut atsiorneqartoq: Sulisut affaat nunaqavissuussapput
Ingerlatseqatigiiffiup aatsitassarsiorfiup ukiuni qulini ingerlanneqarnissaa maanna anguniarpaa. Moriusamili ilmenitinik ukiuni qulinit amerlanerusuni piiarneqarsinnaasunik peqanngitsoq, Bo Stensgaard naliliivoq.
- Pisariaqartinneqassappat tunineqarsinnaappatalu ukiunik qulinik ilaqqinneqarsinnaavoq.
Unnuinissamut tunitsinissamullu periarfissat
Ingerlatseqatigiiffik Naalakkersuisullu suliniut pillugu innuttaasunut upernaaq tusarniaapput.
Qaanaami Savissivinnilu innuttaasut nunaqavissunut suliffissaqartitsisoqarnissaa kissaatigaat, piniartulli akornusersorneqarnissaat kissaatiginagu.
- Piniartut suleqatigaagut. Taakku sumiiffik piniarfittut atorneq ajorlugu ilannguppaat. Sumiiffilli Savissivinnut illuatungaanulluunniit ingerlanerminni uniffigigallartarlugu oqaatigaat, pisortaaneq, Hans Jensen oqarpoq.
- Unnuiffissaqartuarnissaat umiatsiaminnillu pitutsivissaqartuarnissaat neriorsuutigaarput. Neriffissaqarusussagunillu tamanna inississinnaassavarput. Sumiiffilli sulinngiffimmi ornittagaasinnaanavianngitsoq aamma erseqqissaatigaarput.
AAMMA ATUARUK Naalakkersuisut Dundas Titaniumip piiaanissaanut akuersissuteqartut
Ingerlatseqatigiiffiup piniartut piniakkaminnik ingerlatseqatigiiffimmut tunisisinnaanissaannik aamma periarfissinniarpai.
- Nunap immikkoortuani piniartut nerisassanik uagutsinnut tunisisinnaanissaat aamma sulissutiginiarparput. Taakku tassaasinnaapput aalisakkat uumasullu piniagassat.
Sumiiffimmi nannut angalaannartut naapinneqaratarsinnaaneranut aarlerinartoqarsinnaasoq, Aalisarnermut, Piniarnermut Nunalerinermullu Naalakkersuisoqarfiup aatsitassarsiornissaq pillugu tusarniaanermi erseqqissaatigaa. Ingerlatseqatigiiffiup tamanna piareersimaffigissavaa.
- Nannunik sumiiffimmukartoqarnissaanut suleriaasissamik allattorsimasoqarumaarpoq, aamma videomik nakkutilliissutitut ittunik kissartunik soorlu nannunik ingerlasunik takunnissinnaasunik peqarumaarpugut, Bo Stensgaard oqarpoq.
Assi: Dundas Titanium / Bo Stensgaard.
Ingerlatseqatigiiffiup aatsitassarsiorfiup, ammaannartuusussap Moriusallu sissaanit ilmenittinik piiaaffissap sanaartornissaanut ukiut marluk atorneqarumaartussat naatsorsuutigaa. Ingerlatseqatigiiffiup qaqugu aallartinnissaa oqaatigissallugu suli siusippallaarpoq.
- Tunisassiulernissatsinnut ukiup ilai marluk atorneqarumaartut naatsorsuutigaarput. Tassunga aningaasaliinerup qaqugukkut saqqummiunnissaa apeqqutaassaaq, Bo Stensgaard oqarpoq.
Dundas Titaniumip sissamit assaanissaq pilersaarutigaa.
- Oqimaassutsinillu tassa aatsitassanik oqimaatsunik oqitsunillu immikkoortitsissaagut. Taamaaliornitsinni sigguiviit angisuut atorlugit atortussanik errortuissaagut taamaaliornermi kaavisinneqassapput tamannalu ilutigalugu errortorneqassallutik.
![](/sites/default/files/styles/image_934x467/public/dundas_-_ilmenite_bearing_sand_p1020990.jpg?itok=A_zIhzDH)
Assi: Dundas Titanium / Bo Stensgaard.
- Aatsitassat oqitsut erngup qulaaniissapput, oqimaannerillu naqqanut nakkartassallutik. Tassannga oqinnerit tigoqqassavugut, taakku sioqqat 90 procentiisa missaaniissattut sissamut toqqaanartumik ileqqittassallutigit.
- Taama aatsitassat oqimaatsut 10 procentip missaanniittut kiserngoruttassapput.