Aatsitassarsiornissamut isumaqatigiissut atsiorneqartoq: Sulisut affaat nunaqavissuussapput
Dundas Titanium A/S-ip aatsitassanik atortussianik oqimaatsunik soorlu ilmenitsimik Moriusap eqqaani sissamit piiaasinnaanissani pillugu atsiornermik ippassaq pissarsivoq.
Aatsitassanut naalakkersuisup, Jens-Frederik Nielsenip (D) taanna atsiorpaa.
Moriusami aatsitassarsiorneq
Dundas Titanium A/S kalaallit piginneqatigiiffigaat allamit aqutaq, ingerlatseqatigiiffimmut piginnittuusoq Bluejay Miningimik ateqarpoq Tuluit Nunaanneerlunilu.
Aatsitassarsiutileqatigiiffik Moriusami 64 kvadratkilometerinik annertussusilimmi piiaasinnaanissamut akuersissuteqarfiuvoq. Moriusaq Qaanaap Savissiviullu akornanniippoq
Ingerlatseqatigiiffik aatsitassanik oqimaatsunik soorlu ilmenitinik titaniumiliornermut atorneqartartunik tassani piiaassaaq.
Piiaanissamut akuersissut decembarip ulluisa 14-iannit ukiunut 30-nut atuuppoq.
Ingerlatseqatigiiffiup piiaanissaanut matunissaanullu pilersaarut maanna amigaatigaa.
Pilersaarummi tassani aatsitassarsiornerup qanoq ingerlanissaa ilaatigut annikitsortalersorlugu nassuiaatigineqassaaq. Ingerlatseqatigiiffik pilersaarutinik Naalakkersuisunit akuersititsinissamut 2022-mi decembarip ulluisa 31-ata tungaanut periarfissaqarpoq.
Ingerlatseqatigiiffiup aatsitassarsiornermik suliaqarnini kingusinnerpaamik 2025-mi decembarip ulluisa 31-anni aallartissimassavaa.
Piiaanissamut akuersissummik atsiornermut atatillugu suliffeqarnermut avatangiisineqarnermullu naalakkersuisup, Jess Svanep Avannaata Kommunianut aatsitassarsiutileqatigiiffimmullu Dundas Titanium A/S-imut suleqatigiinnissamut isumaqatigiissut aamma atsiorpaa.
AAMMA ATUARUK Naalakkersuisut Dundas Titaniumip piiaanissaanut akuersissuteqartut
IBA (Impact Benefit Agreement) imaluunniit kalaallisut suleqatigiinnissamik isumaqatigiissut nunaqavissunik atorfinitsitsinissamut ilaatigut qulakkeerutaassaaq.
Illuatungeriit pingasut aatsitassarsiornermi sulisut aaffaat tikillugit nunaqavissuussasut isumaqatigiissutigaat.
Aatsitassarsiorfiliornermi 270-it missaanniittut sulisorineqassapput.
Tamatuma kingorna ingerlatsinerup, tamatumanilu aatsitassanik piiaanerup nalaani 175-it missaanniittut sulisorineqarnissaat pisariaqartinneqassalluni.
Aalisakkat, takornariaqarneq maannalu aatsitassat
Illuatungeriit pingasut tamarmik isumaqatigiissummik ippassaq ataasinngornermi atsiugaqarput.
- Akileraartarnikkut assut nunatsinnut iluaqutaassapput. Pingaartumik aamma nunap immikkoortua Avanaata Kommunialu iluaqutigisussaassuaat, aatsitassanut naalakkersuisoq, Jens-Frederik Nielsen oqarpoq.
- Avatangiisinut sunniutaasinnaasunut nalilersuutaasumi takuneqarsinnaavoq tamanut, avatangiisinut sunniunnerlussinnaanera minnerpaarpaaffigisinnaasaaniittoq. Inuusuttut ilinniartitaanikkut aamma suliffissaqarnikkut siunissami sakkussaqarnerulernissaannut suliniuteqarnissaq pillugu una massakkut naalakkersuisoqarfitsinnut uagut aamma nuannaaqataavugut, suliffeqarnermut avatangiisinullu naalakkersuisoq, Jess Svane (S) ilassuteqarpoq.
AAMMA ATUARUK Moriusami ilmenitinik suliniut pillugu tusarniaaneq: Piniakkanut sunniissanngilaq
Aamma Avannaata Kommuniani borgmesterip, Palle Jeremiassenip (S) isumaqatigiissut nuannaarutigaa. Taanna Ilulissani allaffimminit malinnaavoq.
- Avannaata Kommuniata ilisarnaatigivaa inuussutissarsiornikkut assigiinngitsunik eqeersimaarluni ingerlagami. Tassa aalisarneq, takornariaqarneq aammalu sanaartorneq. Massakkullu aatsitassarsiorneq. Tamanna kommunimi nuannaarutigaarput.
- Pingaartutut isigivarput najugaqartut nunaqavissut peqataatinneqarnissaat, borgmesteri oqarpoq.
Borgmesterillu kommunimut pingaartumik Qaanaamut suliffissanik pilersitsisoqarnissaa isumalluarnartuusoq ilanngullugu oqaatigaa.
- Kommunitta iluani immaqa ilungersunarnerusumik inissisimapput inuussutissarsiornikkut massakkut Qaanaaq eqqaaniittut. Taakkua periarfissinneqarnerat isumalluarfigalugu suleqatigilluarnissatsinnut qujavunga peqataatinneqarattalu.
Dundas Titaniumip pisortaanera, Hans Jensen (talerperleq) ingerlatsinermilu pisortaq, Bo Stensgaard (saamerleq) internet atorlugu malinnaapput.
