Naalakkersuisut Dundas Titaniumip piiaanissaanut akuersissuteqartut

Aatsitassarsiornermik suliniut Dundas Titanium nunatta avannaani Moriusap eqqaani ilmenitinik piiaarusuppoq.

Ilmenit titaniumiliornermut atorneqartarpoq. Suliffeqarfillu maanna piiaasinnaatitaalerpoq.

Naalakkersuisummi Dundas Titanium A/S-ip Moriusap eqqaani 64 kvadratkilometerinik annertussusilimmi piiaasinnaanissaa ullumi tallimanngornermi akuersissutigaat. Moriusaq Qaanaap Savissiviullu akornanniippoq.

Naalakkersuisut tusagassiuutinut nalunaarummi allapput.

AAMMA ATUARUK Moriusami ilmenitinik suliniut pillugu tusarniaaneq: Piniakkanut sunniissanngilaq

Akuersissut ukiuni 30-ni atuutissasoq, Naalakkersuisut oqarput.

- Suliniut piffimmi innuttaasunut Kalaallillu Nunaanni tamanut annertuumik periarfissiivoq, aatsitassanut naalakkersuisoq, Jens Frederik Nielsen (D) oqarpoq.

Piiaanissamut akuersissut ingerlatseqatigiiffiup Naalakkersuisullu akornanni decembarip ulluisa 14-ianni tassa ataasinngorpat atsiorneqassaaq.

Tassunga atatillugu Dundas Titanium, Avannaata Kommunia Naalakkersuisullu IBA-mik (iluatsittumik suliniummut suleqatigiinnissamut isumaqatigiissut) aamma atsiussavaat, taannalu nunaqavissunik sulisoqarnissamik qulakkeerinissamik suleqatigiinnissamut illuatungeriit akornanni isumaqatigiissutaavoq.

AAMMA ATUARUK Dundas Titanium mianersoqquneqarpoq: Nannut aarrillu piiaaffissamiittarput

Aatsitassarsiutileqatigiiffiup suliaqarnissamut alloriarnerup tullissaanut ukiunik marlunnik tassa 2022-mi decembarip ulluisa 31-ata tungaanut periarfissaqarpoq. Ingerlatseqatigiiffiummi suliniutip piianissaanut matunissaanullu pilersaarut suliareqqaarluni piiaanini aallartissinnaavaa.

Ingerlatseqatigiiffiup aatsitassarsiornermik suliaqarnini allamik isumaqatigiissuteqartoqanngippat kingusinnerpaamik 2025-mi decembarip ulluisa 31-anni aallartissimassagaa, Naalakkersuisut allapput.