Dundas Titanium mianersoqquneqarpoq: Nannut aarrillu piiaaffissamiittarput

Aatsitassarsiutileqatigiiffik, Dundas Titanium nunatta avannaani Moriussami ilmenitinik piiaarusuppoq.

Moriusaq Qaanaap Dundasillu akornanniippoq, sumiiffillu piniartunit ukioq naallugu nannunniartartunit atorneqartarpoq.

Piniartut suliniuteqartoqarnissaa tigulluarpaat, tassani piniarfigisartagaanni qillerisoqarnanilu qaartiterisoqassanngimmat.

Ilmenit titaniumimik tunisassiornermut atorneqartarpoq. Dundas Titaniumilu sissamini ilmenitinik piiaalissaguni sulisut sillimaffissaqassapput.

Nannut aarrillu nerisassarsiortut

Aalisarnermut, piniarnermut nunalerinermullu naalakkersuisoqarfiup suliniummut allakkatigut tusarniaaneq nassiuppaa.

Naalakkersuisoqarfiup sumiiffimmi nannut ingerlaartut naapinneqaratarsinnaasut erseqqissaatigaa.

- Aatsitassarsiutileqatigiiffiup nannunik naapitaqartarasaarnissaq mianersuutigissagaa naatsorsuutaavoq. Kalaallit Nuananniinnermi sumiiffinni nanoqarfioratarsinnaasuni malittarisassaqarnera najoqqusassaqarneralu maluginiarneqassaaq. Tamanna nunatta avannaata kitaani kingaartumi atuuppoq, tusarniaanermut akissummi allassimavoq.

Naalakkersuisoqarfiup oqarnera naapertorlugu Dundas Titaniumip uumasut qanittumiittut mianersuunneqassapput.

- Sumiiffiup aalisagaqarluarnera, pingaartumik uiloqarluarnera pissutigalugu aarrit nerisassarsiorfiattut pingaaruteqarluarpoq. Qilalukkat qaqortat qernertallu katersuullutik Pikialasorsuarmut aqqusaartartut aatsitassarsiorfimmit mianersuuteqquneqarput, naalakkersuisoqarfik allappoq.

Aatsitassarsiornermik ilinniarfik nunaqartunik maskinaanik ingerlatsisussanik ilinniartitsiniarpoq

Nunaqartut aatsitassarsiutileqatigiiffimmut kissaateqangaatsiarput. Ilmenitiminni piiaasoqalissaguni tamanna nunaqartunut suliffissaqartitsinissaa neriuutaavoq.

Sisimiuni aatsitassarsiornermik ilinniarfiup, KTI-p Qaanaami innuttaasut sapaatini akunnerni tallimani maskiinalerinermik pikkorissartinnissaat pillugu Dundas Titanium suleqatigigaa. Tamannali corona pispsutigalugu unittooqqavoq, atuarfiulli pikkorissartitsinerit 2021-mi nanginneqaqqinnissaat naatsorsuutigaa.

- Qaanaami suliffissaaleqisoqangaatsiarpoq ataatsimoortumillu suliffissanik periarfissanik isumaginninnikkut aatsitassarsiornermik ilinniarfimmi pikkorissartitsinerit naammassisimaneranut uppernarsaatissarsinissamut matumani periarfissaqarpoq, ilinniarfik tusarniaanermut akissuteqaammi allappoq.

Air Greenlandip periarfissat takugai

Dundas Titaniumip Air Greenland kiffartuussinissamik isumaqatigiissusiorfigissaguniuk timmisartuutileqatigiiffiup Qaanaamut pilersuinissamut periarfissat takusinnaavai.

Timmisartumi pilersuinissaq ilaasussallu inissaqarsinnaapput, Air Greenland taamaalilluni qanittumi timmisartoqarnerani Qaanaamut aqqusaartarsinnaassaaq.

- Tamanna Dundasip timmisartut ulikkaanngippatigit taava Qaanaap aqqusaarnissaa pilersaarutigineqarsinnaavoq, taamaalilluni Dundas Titaniumimut timmisartuussinermi ilaasussanut aqqutissiuussisoqarsinnaalluni, Air Greenland tusarniaanermut akissuteqaammi allappoq.

Tusarniaaneq suliniummut tusarniaanikkut akissuteqartoqarnissaa siunertaavoq, taakkulu innuttaasut suliffeqarfiilluunniit allat suliniummut ilanngussinnaasaat avatangiisinut inuiaqatigiinnullu tunngatillugu nalunaarsuinernut atuuttunut ilanngunneqarsinnaassapput.

Namminersorlutik Oqartussat Dundas Titaniumillu aallartitaanni piiaanissamut qinnuteqartoqarnera tunngavigalugu Namminersorlutik Oqartussat tusarniaassuteqarput.

Tusarniaaneq septembarip ulluisa aappaannut piffissaqartinneqarpoq.