Moriusami ilmenitinik suliniut pillugu tusarniaaneq: Piniakkanut sunniissanngilaq
Nunatta avannaani nunaqarfik, inuerussimasoq inoqaqqilersinnaavoq. Sissaanimi ilmenitsinik titaniumimik tunisassiornermut atorneqartartunik sioraqarpoq.
Ilmenitip nunarsuarmi tamarmi piumaneqarnera annertusiarpoq, nunattalu avannaani peqarnera nunarsuarmi neriuuteqarnarnerpaatut nalilerneqartoq, Greenland Venture siorna novembarimi paasissutissiivoq.
AAMMA ATUARUK Bluejay Mining Qaanaap kujasissortaani ilmenitimik piaanissaaminut qanilleriaqqittoq
Aatsitassarsiutileqatigiiffik Dundas Titanium Moriusap sissaani ilmenitinik piiaarusuppoq. Taamaammat aatsitassanut naalakkersuisoq Jens Frederik Nielsen (D) aamma suliffeqarnermut avatangiisinullu naalakkersuisoq Jess Svane (Siumut) Ilulissani, Qaanaami Savissivinnilu innuttaasunut aasap ingerlanerani ataatsimiititsipput.
Inuttaasunik ataatsimiititsinermi innuttaasut suliniummut atatillugu apeqquteqarsinnaanissaat siunertaavoq.
Savissivimmi aatsitassarsiutileqatigiiffiup aallartilluarnissaa neriuutigineqartoq
Savissivimmi nunaqarfiup siulittaasuini siulittaasoq, Hans Karlsen Savissivinni innuttaasunut ataatsimiititsinermut peqataavoq.
Privatfoto: Hans Karlsen.
Namminersorlutik Oqartussalli Naalakkersuisullu silap ajornera pissutigalugu tikissinnaannginnerat pissutigalugu ataatsimiititsineq oqarasuaatikkut ingerlanneqarpoq.
Aatsitassarsiornissamulli paasissutissalli nassiunneqarput saqqummiinerlu oqarasuaatikkut ingerlanneqarluni, Hans Karlsen oqarpoq:
- Neriuppunga ingerlallualissasoq. Piniarnermut tunngasunik annerusumik kalluaasussaagunannginnami. Taavalu qaartiterisartussaannginnamik. Pinngortitamut ajoqusiisinnaanerit ilimagisaminngaanniit annikitsuararsuupput.
Taassumalu suliffissaqarnermut atatillugu aatsitassarsiortoqarsinnaaneranut Savissivinnit suliffissaqartoqarsinnaanissaa neriuutigaa.
- Ingerlallualeriarpat nunaqavissut, Qaanaarmiut maanimiunillu suliffissaqarnissaat iluaqutaassasoq qularinngilara.
Qaanaami piniartut: Killilerneqassanngilagut
Qaanaami aalisartut piniartullu peqatigiiffianni, KNAPP-mi siulittaasoq, Mads Ole Kristiansen tusarniaanermut peqataanngilaq, taamaakkaluartorli suliniut piffissami sivisuumi malinnaaffigaa.
- Taakani Moriusami akunniffigisinnaasatsitut peersinneqanngikkutta piiaanissaq ajoqutaanavianngitsutut nalilerpara, KNAPP-mi siulittaasoq oqarpoq.
Taassuma Qaanaami piniartut umimmannialeraangamik Morisaq aqqusaartaraat nassuiaatigaa.
- Moriusap eqqaa qimussimik ukiut tamaasa nannunniariartarfigileratsigu. Nanoqarfissuanngornikuugami taamaattumik mattunneqannginnissarput kissaatigisorujussuuarput, Mads Ole Kristiansen oqarpoq.
Taamaakkaluartorli suliniut ataatsimut isigalugu ajorinngilaa.
- Ukiuni amerlasuuni piaanissamik siulittuuteqarnikuunera ajunngitsutut oqaatigisinnaavara, nunaqavissunik atorluarneqarnissaa iluaqutaanissaalu kissaatigaara.
Tusarniaanertalia septembarip ulluisa aappaannut killeqartinneqarpoq.
Tamatuma kingorna aatsitassarsiutileqatigiiffiup tusarniaanerit katersoriarlugit sukumiisumik nalunaarusiarissavai. Naalakkersuisullu tamatuma kingorna ASN-imik IPN-imillu nalunaajaanerit tusarniaanermiillu sukumiisumik nalunaarusiaq akuerissanerlugit aalajangissavaat.