Bluejay Mining Qaanaap kujasissortaani ilmenitimik piaanissaaminut qanilleriaqqittoq
Naqqiut: KNR siusinnerusukkut allappoq, Aatsitassarsioqatigiiffiup avatangiisinut sunniutaasinnaasunik naliliinermut nalunaarusiaa akuerineqartoq. Tamannali eqortuunngilaq. Avatangiisinut sunniutaasinnaasunik naliliineq tusarniaassutigineqareertinnani akuerineqarneq ajorpoq.
Bluejay Miningip avatangiisinut sunniutaasinnaasunik naliliinermut (ASN) missingiutitut nalunaarusiaa, Namminersorlutik Oqartussat Aatsitassanik Suliassaqarfinnut Avatangiisinut Aqutsisoqarfiata akueraa.
Bluejay Miningip suliniutiminut Dundas Ilmenitemut tunngatillugu ukiuni pingasuni misissuititsereerluni nalilersuisitsereerlunilu, Moriusap Qaanaap kujasissortaaniittup eqqaani ilmenitemik piiaanissamut qinnuteqaatini, naalakkersuisunut siorna septembarip ulluisa 17-ianni nassiuppaa.
Qinnuteqaataa avatangiisinut sunniutaasinnaasunik naliliinermut (ASN) inuiaqatigiinnilu piujuaannartitsineq pillugu naliliinermut (IPN) nalunaarusianik naatsorsuutigisamik imaqarpoq.
Avatangiisinut sunniutaasinnaasunik naliliinermut (ASN) nalunaarusiaa Namminersorlutik Oqartussanit akuerineqarpoq, tamannalu Bluejay Miningip nuannaarutigaa.
- Avatangiisinut sunniutaasinnaasunik naliliinermut (ASN) nalunaarusiarput piiaanissamullu akuersissummik qinnuteqaaterput imminnut naapertuunnerarneqarnerat nuannaarutigeqaarput, Bluejay Miningimi pisortaaneq, Roderick McIllree, tusagassiutinut taama allappoq.
IPN-iliaata akuerineqarnissaa tullinnguuppoq
Aatsitassarsioqatigiiffiullu inuiaqatigiinni piujuaannartitsineq pillugu naliliinermut (IPN) nalunaarusiani pillugu sapaatit-akunnerini tulliuttuni akissutisinissani neriuutigaa.
ASN IPN-ilu pillugit paasissutissat piviusut:
ASN Avatangiisinut Sunniutaasinnaasunik Naliliineq-mut naalisaataavoq.
Avatangiisinut Sunniutaasinnaasunik naliliinermi (ASN) suliniut avatangiisinut qanoq sunniuteqarsinnaanersoq misissorneqartarpoq. Avatangiisinik innarlitsaaliuinissamut inatsit naapertorlugu Naalakkersuisut tamatumunnga akuersiteqqaartinnagit nunami sanaartukkat ilaat aallartinneqarsinnaanngillat allanngortinneqarsinnaanatilluunniit.
Inatsisitigut piumasaqaataasut ASN-imut nalunaarusiami naammassineqarsimappata nalunaarusiaq IPN-imut nalunaarusiaq - suliniut inuiaqatigiinnut qanoq sunniuteqarsinnaanersoq pillugu nassuiaatitalik - ilanngullugu tamanut ammasumik tusarniaassutigineqassaaq. Tassa imaappoq, innutaasut suliamut tunngatillugu apeqquteqarsinnaallutillu tusarneqassapput.
Paasissutissanik pissarsiffik: Naalakkersuisut
Namminersorlutik Oqartussat Bluejay Miningip inuiaqatigiinni piujuaannartitsineq pillugu naliliinermut (IPN) missingiutitut nalunaarusiaa akuerissappassuk, Bluejay Miningip nalunaarusiai marluk (ASN IPN-ilu) kalaallisut, danskisut tuluttullu allatanik tusarniaassutertallit tamanut ammasumik saqqummiunneqarnissaannut piareersarneqassapput. Sivikinnerpaamik sapaatit-akunnerini arfineq-pingasuni tusarniaassutigineqarnissaat piumasaqaataavoq.
Bluejay Mining nunatsinni aatsitassanik piiaanissamut marlunnik allanik suliniuteqarpoq: Qeqertarsuaq-Nuussuarmi nunami 2.897 kvadratmeteriusumi nikkelimik, kanngussammik platinimillu piaavissaq aamma Kangerluarsummi nunami 692 kvadratmeteriusumi zinkimik, aqerlumik sølvimillu piiaavissaq.
Aningaasaatileqatigiiffik naalagaaffiup pigisaa Vækstfonden Greenland Venture A/S-ilu Bluejay Miningip avannaani aatsitassarsiornissaanut 35 millionit koruuningajannik ukiaq aningaasaliipput.
Ilmenit piumaneqartoq
Ilmenit nunanit tamalaanit piumaneqaleraluttuinnarpoq, avannaanilu ilmeniti nunarsuarmi ilmenitini piiarneqarsinnaasuni akuitsuunerpaatut nalilerneqartartoq, Greenland Venturep siorna novembarip qaammataani ilisimatitsissutigaa.
- Avannaani ilmeniti ingammik qaffasissumik pitsaassuseqarmat annertoorujussuarlu tunisassiarineqarsinnaammat piiaavigissallugu soqutiginarpoq, Greenland Venturemi pisortaaneq, Karsten Høy, oqarpoq.
Bluejay Miningip suliniutiminut Dundas Ilmenitemut tunngatillugu nunaqarfimmi inuerunnermi Moriusami Qaanaap kujasissortaaniittumi sissaq ilmenitimik piiaavigerusuppaa.
Sissamimi tassani sioqqat ilmenitimik titaniumimik tunisassiornermut atorneqartartunik akoqarluarpoq.