Dronningip aasaru nunatsinnukarsinnaassalluni neriuutigigaa
2020-mi takorluukkatsitut pisoqarpa?
- Naagga! dronning Margrethe ukiutoqqami ileqqumisut oqalugiarami oqarpoq.
- 2020-mi pisut kialluunniit pisussatut takorloorsimanngilai, taanna oqarpoq.
Dronningip taama oqarnermini coronavirusi nunarsuaq tamakkerlugu ukioq manna tuniluutilerluni pissutsinik mumisitsilluinnarsimasoq soorunami eqqartorpaa.
Inunnut qanillinaveersaarnikkut, ilaatigut angerlarsimaannarnikkut sungiusimasatsinniillu ilaannikkut allatut suleriuseqarnikkut ileqqutsinnik allannguisariaqarsimasugut, dronning erseqqissaavoq.
Ukiorlu qaangiutilersoq eqqarsaatissiivoq. Ilikkakkavummi sorpiaappat? Dronning aperaaq.
- Qanigisatta, atukkatta pigisattalu qujamasuutiginissaat annaasaqarsimagaangatta pinngitsuugaqartariaqarsimagaangattalu ilikkartarparput.
- Inoqatinut atassuteqarnerup, atassuteqaannarnissap inuiaqatigiinnilu akuuffigisatsinni tatigeqatigiinnissap qanoq pingaaruteqartiginerannik eqqaasinneqarpugut.
Dronningi: Corona Kalaallit Nunaanni siaruatsaalineqarsimasinnaavoq
Nunarpullu nunanut allarpassuarnut sanilliulluni covid-19-imit eqqugaannginnerugaluartoq, corona nunatsinni Savalimmiunilu ulluinnarni inuunermut aamma sunniuteqarpoq.
- Kalaallit savalimmiormiullu nappaat suliniuteqarluarnikkut paasinnilluarnikkullu siaruatsaalisinnaasimagaluarlugu nappaat akisunaarpaat, dronning Margrethe oqarpoq.
AAMMA ATUARUK Coronavacciner klar til alderdomshjem: Beboere glæder sig
- Takornarialerineq Kalaallit Nunaannut Savalimmiunullu ukiuni kingullerni pingaaruteqaleraluttuinnarsimasoq unittoorluinnangajappoq – aningaasarpassuarnik annaasaqaataasumik. Aasaru Savalimmiunukaqqissinnaassallungalu Kalaallit Nunaannukaqqissinnaassallunga neriuutigaara.
Nunanili tamalaani peqqissutsikkut oqartussat coronamut akiuussusiisaleruttorput, nunatsinnilu aamma taamaaliortoqartussanngorluni.
- Coronamut akiuussutissaqalernera akiuussusiisoqalereerneralu nuannaarutissaallunilu qiimmassaataavoq, dronning Margrethe oqarpoq.
Aappaagu ukioq kunngikkormiunut Kalaallit Nunaannullu immikkuullarissuusussaasoq
Dronningi oqalugiarnermini aappaagumut aamma qilanaarnerarpoq. Aappaagumi ukioq nunatsinnut kunngikkormiunullu immikkuullarissuusussaavoq.
- 2021 kunngi Christianip qulingat dronnig Alexandrinellu ernitik inersimasut marluk, tassa ataataga kunngissaq Frederik prins Knudilu ilagalugit, kunngip umiarsuaanik Nuummukarlutik nunatsinnut tikeraaqqaarnerannit ukiut 100-nngortorsiorfiussaaq.
AAMMA ATUARUK Dronningip silap pissusiata allanngoriartornera, kiserliorneq asanninnerlu oqalugiaatigai
- Hans Egedep nunatsinnut tikinneranit aamma ukiut 300-nngortorsiorfiussaaq, tassa 2021 Kalaallit Nunaannut Savalimmiunullu pisoqarfiungaatsiassaaq. Kalaallit Nunaannukaqqinnissannut tassanilu innuttaasut naapeqqinnissaannut qilanaarpunga.
- 2021 ajunngitsunik angusaqarfiugilitoq. Savalimmiumi Kalaallit Nunaannilu innuttaasut tamaasa ukiortaamut iserluarnissaannik kissaappakka.
Dronningip oqalugiaataa tamakkiisoq uani atuarsinnaavat.
