Dronningip silap pissusiata allanngoriartornera, kiserliorneq asanninnerlu oqalugiaatigai
Qaammammut mittoqarneranit ukiut 50-it qaangiuttut. Silap pissusiata allanngoriartornera. Kiserliorneq. Sønderjyllandip Danmarkip sinneranut ataatsimut kattuteqqinnera. Ilaquttanut Kalaallit Nunaannut Savalimmiunullu asanninneq.
Tamakku tamarmik Dronning Margrethep ukiortaamut danskit nalunaaqutaat naapertorlugu arfinermut 48-ssaanik oqaluigiarnerani ilaapput, oqalugiarneralu Amalienborgimi Christian IX-s Palæmit toqqaartumik aallakaatinneqarpoq.
Dronning nuffasersimavoq oqalugiarnerminilu arlaleriarluni kakkittariaqarsimalluni.
Dronningip ukiortaami oqalugiaataata saqqummersinneqarnera DR-mit akuersissuteqarnikkut takutinneqarpoq
- Nunarsuarpulli alutornartorsuaq allanngorartoq mianernarpoq. Tamatuma paasinissaanut ilikkariartorpugut, tamanna ernumanarsinnaavoq minnerunngitsumik inuusuttorpassuarnut silap pissusiata ukiuni makkunani allanngoriartorneranik isiginnittunut.
- Nunarsuatsinnut inuppassuaqartumut ataatsimoorluta pisussaaffeqarpugut. Tamanna tamatsinnut ullumikkut unammillernarpoq, tamatumanilu qanoq inuunerput qanorlu iliornitta sissuerluarnissaa apeqqutaavoq, dronning oqarpoq, taassuma oqaluarnini inuppassuit – pingaartumik inuusuttorpassuit – ernumassutigisaat tassa silap pissusiata allanngoriartornera aallarniutigaa.
Kiserliorneq kattuteqqinnerlu
Nunarsuup allanngoriartornera ernumassutigineqarpoq. Misigissuseq alla oqallisigeqqusaavallaangitsutut suli ippoq:
Kiserliorneq. Misigissuseq taanna inuppassuit nalaattarpaat.
- Kiserliorneq. Misigissuseq taanna inuppassuit nalaattarpaat. Inuuniarnikkut ajornartorsiuteqartuniinnaanngilaq, utoqqarpassuit aappaminnik ukioqatiminnillu annaasaqarsimasut naak taakku ulluinnaannik immersuisut. Tamanna meeqqanut inuusuttunullu aamma taamaassinnaavoq. Kiap pinnguaqatigerusuppaanga? Kina oqaloqatigisinnaavara? Facebookiinnanngitsoq, ilumoortumillu: imminut isigaluni ukioqatigisaq ukioqqortunerusorluunniit tatigisinnaasaq oqaloqatigalugu. Eqqarsaatinik avitseqatigalugu.
AAMMA ATUARUK Dronning Naalagaaffeqatigiinnut nerisitsisoq
Tamatuma kingorna oqalugiarnini allamut saatsippaa tassa ukiut 80-it matuma siorna apriilip ulluisa qulingiluaanni Danmark tiguagaavoq, juutinik qinngarsuineq, allanik isumalinnik akaarinninnginneq – aamma Sønderjyllandip Danmarkimut kattuteqqinneranit juulimi ukiuni 100-nngortorsiornera, taakkulu kingorna oqalugiarnini ilaquttaminut Kalaallit Nunaannullu asanninnerminnut saatsippaa.
Kalaallit Nunaanniittut tamarmik ukiortaami pilluaqqugai
- Kalaallit Nunaanni sermersuup aakkiartornera ilutigalugu nunarsuarmit nunamut avannarpasissumut ukkatarinninneq annertusiartorpoq. Nuna inuilu uanga ilaquttamalu uummataannut qanipput. Kalaallit Nunaanni susoqarnera qanorlu ingerlasoqarnera malinnaaffiuaannarparput, ajornartorsiortoqaleraangallu isumalluartumik iliuuseqaleraangassi eqqarsaatitsinniittuaannarpusi. Kalaallit Nunaanniittut tamarmik ukiortaami ajunngitsumik pilluarnartumillu kissaappakka, dronning oqarpoq.
AAMMA ATUARUK Dronningi: Trump suli tikilluaqqusaavoq
Tamatuma kingorna qungujulluni Prins Joachim taassumalu DR-ikkut Danmarkip oqaluttuarisaanera pillugu allakaatittagai nersualaarpai.
- Tamanna pikkoriffigigaa eqqarsarpunga, dronning tulluusimaarluni oqarpoq.
- Prins Christian ukiumi nutaami apersortittussaavoq. Inuusuttunnguannguliivippoq. Uangalu akunnaalliliissalluga. Ukiorpassuit inuuvunga.
Dronning ukiuni nutaami apriilip ulluisa 16-ianni 80-iliisussaavoq.
- Ukioq 2020 aallartiliivippoq. Ukiup qanoq imaqarumaarnera suli naluarput. Kikkut tamarmik angisuunik annikitsunillu anguneqarsinnaasunik inornanngitsunillu pilersaaruteqarput. Ataatsimoorluta ukiumut nutaamut iserta. Tamassi ukiortaarsiorluarisi, dronning naggasiilluni oqarpoq.
Dronningip oqaluarnera tamaat uani atuarneqarsinnaavoq (danskisut allassimavoq).
