Dronningi: Trump suli tikilluaqqusaavoq
USA-p præsidentia Donald Trump Danmarkimut tikeraarnissamut tikilluaqqusaavoq. Dronning Margrethe TV2-mut ullumi taama oqarpoq.
Trump suli tikilluaqqusaasoq, dronning Margrethe, Slesvig-Holsteinimut tikeraarnermi oqarpoq.
Allattoq Ritzau
septembarip 05-at 2019 15:43
Nutserisoq Mads Lynge
Tassa imaappoq, naak Donald Trumpip Danmarkimut pisortatigoortumik tikeraarnissani qanittukkut taamaatiinnaraa, piffissami allami tikeraarsinnaassaaq:
- Tikeraarnissamik taamaatitsiinnartoqartariaqarsinnaasarpoq, taava kingusinnerusukkut tikeraartoqarsinnaanissaa isumaliutigineqarsinnaavoq, imaassinnaavormi oqartoq: "Maanna tikeraarsinnaanngorpunga", qaaqqusissummi suli atuuppoq, Dronning Margrethe oqarpoq.
USA-p præsidentia Danmarkimut septembarip ulluisa aappaanni pingajuannilu tikeraartussaagaluarpoq.
Trumpilli tikeraarnissaa soorlu oqaluuserineqareeqisoq taamaatiinnarneqarpoq, USA-p Kalaallit Nunaannik pisisinnaanissaa ministeriunerup Mette Frederiksenip itigartimmagu.
