Utoqqaat angerlarsimaffiat akiuussutissaq pillugu: Utoqqaat kapitinnissamut qilanaarput
Nuummi utoqqaat angerlarsimaffianni Ippiarsummi najugallit oqiliallassinnaanngorput. Nappaassuaq coronavirus peqqutaalluni utoqqaat angerlarsimaffianni qaammatit kingulliit qulit sillimasoqareersorlu maanna akiuussutissamik kapitinnissaq tullinnguuppoq.
68-inik ukiulik Helge Sethsen Ippiarsummi najugallit 33-usut ilagaat. Taanna kapitinnissaminut qilanaarpoq, peqqutissaqarluarpormi:
- Toqussutaasarnera pissutigalugu kapitinnissamut akuersivunga, Helge Sethsen KNR-imut oqarpoq.
AAMMA ATUARUK Covid-19-imut akiuussuserneqartussaq siulleq kapitingajalerpoq
Jonna Mathiassen utoqqaat angerlarsimaffianni pisortamut tullersortaavoq. Sulisullu coronavirusimut akiuussutissamik kapitinnissaminnut amerlanerpaartaat akuersisimasut taanna oqarpoq. Ilaqarpulli aamma kapitinnissaminnut suli tunuarsimaartunik.
- Kapitittussat siulliit takoqqaarusuppaat qanoq innersut. Kingunerisinnaasaat suunersut takoqqaarusullugit. Nunarsuup sinnerani taamatut kapoorineq nutaajummat, nunatsinnilu aamma nutaajulluni. Taanna pineruaat, Jonna Mathiassen oqarpoq.
Puiortunut ilaqutaasut aalajangiissasut
Akiuussutissap qanoq sunniunniartarnera nakorsaanerup Henrik L. Hansenip siusinnerusukkut nassuiarnikuuaa. Nakorsaataarniarfinniit Pfizerimit Biontechimeersunit akiuussutissanik nunatsinni ataasinngorpat siulliit kapitissapput. Kapiteqqaarnermiillu sapaatit akunneri pingasut qaangiuppata aappassaaneerlutik kapiteqqinnarmi akiuussuserneqarneq naammassissaaq.
Akiuussutissamik kapitinnissaq inuup nammineq aalajangingassaraa. Ippiarsummili najugallit ilaat puiortunngornikuupput namminnerlu aalajangiisinnaanerat killeqarsinnaalluni.
- Tassani immikkoortortaqarfimmi najugaqartut ilaqutaasut qanigisaalluunniit siulliit sulisuninngaanniit apersorneqassapput kapitinnissamut neqeroorummut akuersinersut. Puiortunngornikut namminneq akisinnaanerat killeqarmat, Jonna Mathiassen oqarpoq.
Ippiarsummi najugalik siulleq ataasinngorpat januaarip sisamaani ullaakkut qulingiluanut kapitissaaq.
