Covid-19-imut akiuussuserneqartussaq siulleq kapitingajalerpoq
![](/sites/default/files/styles/image_934x467/public/article_images/covid-19_vaccine.jpg?itok=CKKEedg_)
Covid-19-imut akiuussusersuinissamut maanna pilersaarusiortoqaleruttorpoq.
Covid 19-imut akiuussuserneqartussat siulliit sapaatit akunnerata tulliani kapineqassapput. Takkuupput Nuummi Ilulissanilu utoqqaat illuanni najugallit.
Nakorsaataarniarfinniit Pfizerimit Biontechimiillu akiuussutissat Danmarkimut tikiuttut aamma nunatsinnut ingerlateqqinneqarput.
Akiuussutissat taakku uloriananngitsut, nunatta nakorsaanera KNR-imut oqarpoq.
- Taama isumaqanngilagut. Inuppassuit ullumikkut kapitissimalereerput, kapitereernerullu kingunerisaanik ilungersunartunik saniatigut sunniuteqarpasinngilaq,
Nunatta nakorsaanera, Henrik L. Hansen, akiuussutissat siulliit nunatsinnut ippassaq nassiunneqartut pillugit oqarpoq.
AAMMA ATUARUK Covid-19-imut akiuussutissaq nunatsinnut apuuppoq
Sapaatit akunnerata tulliani ulloq sorlerpiaq akiuussusersuisoqassanersoq erseqqissumik suli ulluliisinnaannginnerarput.
- Sumiiffiit assigiinngitsut kapooriffissatut misissorneqarput. Angisuujusariaqaramik, inunnut utaqqisunut, kapitittussanut kapitereernerullu kingorna minnerpaamik 15 minutsi isersimasariaqaramik sapigaqarnersut sillimaffigalugit upalungaarsimasariaqaratta, nunatta nakorsaaneqarfiani nakorsaq, Paneeraq Noahsen oqarpoq.
Kapitittut siulliit aappassaaneerlutik kapiteqqissapput
Inuit siullermik kapiteqqarneranniit sapaatit akunneri pingasut qaangiutereerpata aappassaaneerlutik kapiteqqikkunik akiuussuserneqarnerat naammassissaaq.
Marloriarluniluunniit akiuussuserneqarsimagaluaraanni covid-19-inik tunillanneqarsinnaajunnaarnermik kinguneqarnaviarunanngitsoq, taamaammallu suli siussuertoqassasoq, nakorsaq ilisimatitsivoq.
- Napparsimassutigisinnaajunnaassavat. Massakkut nalunarpoq qanorpiaq pisoqartarnersoq kapitereernerup kingorna tunillatsikkaanni. Imaassinnaavoq virusimik tunillatsittutit illit napparsimassutiginngisannik, kisianni aamma imaassinnaavoq tunillaassuisimasinnaasutit, Paneeraq Noahsen oqarpoq.
AAMMA ATUARUK Aasianni tunillatsittoqartoq
Covid-19-imut akiuussutissamik kapitinnissamik neqeroorfigineqarneq akuerissanerlugu inuup nammineq aalajangigassarigaa, nakorsaanerup ilanngullugu erseqqissaatigaa. Akerliliinissamulli peqqutissaqannginnerarpaa.
- Imminuinnaq illersornissaq uani pineqanngilaq, inuiaqatigiinnili tunillaassuutilinnginnissaa uani aamma pingaartinneqarpoq, Henrik L. Hansen oqarpoq.
Covid-19-imut akiuussutissat 975-it Nuummut ippassaq apuunneqarput. Taakku Dronning Ingridip Napparsimmavissunuakaanneqarput.
Nuummi Ilulissanilu utoqqaat illuanni najugallit akiuussuserneqareerpata, innuttaasut tulliunneqassapput.