Covid-19-imut akiuussutissaq nunatsinnut apuuppoq
Covid-19-imut akiuussutissat 975-it Danmarkimiit nunatsinnut nalunaaqutaq aqqanernut tanneq tallimat, tassa 10:25 Kangerlussuarmut timmisartumik ilaallutik tikipput. Taamaalilluta nunaqqaterput siulleq sapaatip akunnerata tulliani akiuussuserneqarsinnaassasoq, nakorsaaneq oqarpoq.
- Sapaatit akunnerata tulliani aallartissinnaanissaa naatsorsuutigaarput, Henrik L. Hansen oqarpoq.
Nakorsaataarniarfimmiit akiuussutissat Pfizerimik Biontechimiillu, Danmarkimut tikiuttut nunatsinnut aamma ingerlateqqinneqarput. Akiuutissat 975-it tamarmik Dronning Ingridip napparsimmavissuani qerititsivimmiitinneqassapput, akiuussutissalli 300-t Ilulissanukaanneqassasut, nunatta nakorsaanera oqarpoq.
Utoqqaanerusut saliunneqassasut
Nunatsinni akiuussitissamik kapitittussat siulliit tassapput Nuummi Ilulissanilu utoqqaat illuanni najugallit.
- Utoqqaat Nuummi Ilulissanilu illuini najugaqartut, taavalu illoqarfinni taakkunani marlunni innuttaasuni utoqqaanerusut, akiuussuserneqarnissamik neqeroorfigineqassapput, Henrik L. Hansen oqarpoq.
Qanoqqissaaq akiuussusersuisoqassava?
- Utoqqaat illuini najugaqartut utoqqaat illuini akiuussuserneqarnissamik neqeroorfigineqassapput. Tassalu peqqinnissaqarfimmit sulisut utoqqaat illuinukassapput. Namminnerlu angerlarsimaffilinnut Nuummi Ilulissanilu qitiusumik akiuussusersuiffeqassaaq, taakkuali sumiissanersut suli aalajangerneqanngilaq, Henrik L. Hansen oqarpoq.
Taakku kapitereerpata innuttaasut utoqqaanerit sanngiinnerusut, taakkununngalu sullissisut siulliunneqassallutik.
Akiuussutissaq pisariusoq
Sooruna kisimik Nuummi Ilulissanilu innuttaasut siulliullugit akiuussutissalerneqassasut?
- Pilersaarut taanna, naalakkersuisut peqatigalugit aalajangiussaavoq, akiuussutissat nassiunneqaqqaartut ikitsuaraanerat peqqutaavoq. Akiuussutissat pisagut siulliit 975-iupput. Atornissaalu pisariusorujussuulluni. Taanna 80 minus gradernik nillertsigisumi uninngatinneqartussaavoq, atunnginneranilu kimikillisarlugu akuneqaqqaassaaq, nakorsaaneq oqarpoq itisiliillunilu.
- Taakku tamarmik immikkut ilisimasalinninngaanniit suliarineqartariaqarput, akiuussutissallu taakku 975-t sinerissamut imaaliaallaannaq nassiussuunneqarsinnaannatik. Akiuussutissalersuisinnaasut eqqarsaatigalugit, taamaammat Nuuk Ilulissallu siulliuttariaqarsimavagut. Akiuussutissalli allaanerit pisinnaanngoriarutsigit nunatta sinneranut akiuussutissanik nassiussuisinnaalernissarput naatsorsuutigaarput, taakku pisariunnginnerujussuussussaagamik.
