Disko Linep Qeqertarsuup Tunuani kiffartuussinera borgmesterip isornartorsioraa
Kiffartuussiffiusuni tassa Qeqertarsuarmi Qasigiannguanilu pisiniarfinni inuussutissat ikittuararsuupput - Ilulissanilu pisiniarfinni pisiassanik ulikkaarluni.
Qeqertarsuarmi innuttaasoq, Kasper Broberg taama isornartorsiuivoq. Taassuma Disko Linep angallataanik assartorneqartut allakkat kinguaattooraluarlutik apuuttarnerat pisiassanillu tikittoqartannginnera eqqarsarnartoqartippaa.
AAMMA ATUARUK Borgmesterit Naalakkersuisullu ilaasunik angallassineq oqaloqatigiissutigisussanngoraat
- Maani aalisartugut Aasiannut utikkapput. Ilulissanut utikapput. Sooq taava uagut pajunneqarsinnaassanngilagut pisiniarfiup imassaanik? Imaluunniit napparsimmavitta amigaataanik? Assigiinngitsullu allat pingaarutillit.
Kommune Qeqertalimmi borgmesterip, Ane Hansenip (IA) isornartorsiuineq taperserpaa.
- Taassuma saniatigut pilersuinikkut, soorlu pisiniarfinni pisiassat nutaat naatitat, taavalu aamma napparsimaveqarfinni aaversinnerit allallu ingerlaavartumik ingerlanneqartartussaasut, ajornartorsiorfiupput massakkut ingerlanneqartarnerat pitsaasuunnginnami, Ane Hansen KNR-imut oqarpoq
Disko Line: Napparsimasunik angallassinerit qulimiguuliullu ajoquteqarnera
Kiffartuussinissamut isumaqatigiissut naapertorlugu Disko Linep ilaasartunik angallassinissaq nerisassanit pingaarnerutittussaagaa, Disko Linep pisortaanerata, Noëlle Simoudip erseqqissaatigaa.
- Ilaannikkut attavigiteriasaartarpugut soorlu suliarinnittoqarniarluni (operationit) tuaviuussassat, uku ikipallassinnaavisigit? Soorunalimi taakkua pingaartittarpavut.
Disko Linep nioqqutissat imaatigut Qeqertarsuarmukaanneqarsinnaanissaannut periarfissat misissorsimagaluarpai. Sikulli nalunarnerata sivisunerusumillu taartarnerata kingunerisaanik angallassivik qulimiguulimmik saniatigut atuisariaqarpoq.
AAMMA ATUARUK Naalakkersuisut Kujataani qulimiguullit ataatsimik ilagaat
Qulimiguulilli Bell 212 ilaasunut qulingiluanut inissalik januaarip 26-anniit februaarip 7-iannut teknikkikkut ajoquteqarpoq. Tassungalu taarsiullugu qulimiguullit AS350 sisamanik ilaasoqarsinnaasut atorneqarlutik.
Taakkulu allakkanik nioqqutissanillu inissaqartitsivallaanngitsut, suliffeqarfiup paasissutissiissutigaa.
Ane Hansen: Kiffartuussinermut isumaqatigiissutit politikerinut oqallisiginiaraa
Timmisartortartullu silap qanoq innera angalasinnaanerminnullu akunnerit eqqarsaatigisariaqarpaat. Taakku pillugit qulimiguullit AS350-it ulluni aqqaneq marlunnit ulluni arfiniliinnarni atorneqarput.
AAMMA ATUARUK Kujataata sikoqarnerujussua angallannermut akornusiivoq
- Allakkanut assartugassanullu immikkut ittumik angallassisussamik pilersitsivugut, kingulliit sapaatiuppat assartorneqarnissaat naatsorsuutigaarput, Disko Line paasissutissiivoq.
Tammannali naammanngilaq. Taamaammat Ane Hansenip Naalakkersuisut Inatsisartullu Nunatta avannaani kiffartuussinermut isumaqatigiissutinik misissuisinniarpai.
- Qujanartumik qaaqquneqaratta borgmesterit ilanngulluta naalakkersuisut inatsisartullu angallassinermut isumaqatigiissutit pillugit isumasioqatigiinnissaanut marsip 20-anni 21-annilu. Aamma isumaqarpunga tassani piffissanngortoq naalakkersuinikkut ersarinnerulaartumik pilersaarutinik angallassinermut tunngasunik tusartinneqarnissarput.
