Borgmesterit Naalakkersuisullu ilaasunik angallassineq oqaloqatigiissutigisussanngoraat

Kommune Kujallermi borgmesteri Kiista P. Isaksen eqqartuinissamut qilanaarpoq:

- Uani oqaloqataanissamut erinisuppugut. Ilumoorpoq pitsaanerusumik aaqqissuisoqartariaqartoq, Kommune Kujallermi borgmesteri oqarpoq.

- Angalannermut isumaqatigiissutit pillugit kommunit aggersarneqarnerat qaaqqusaanerat nuannaarutigaara, Avannaata Kommuniani borgmesteri, Palle Jeremiassen, oqarpoq.

Angallannikkut kiffartuussinissamik isumaqatigiissusiortoqaraangat, Naalakkersuisut tamanna kisimiillutik ilusilersortaraluarpaat. Borgmesterillu aamma isumasiorneqartalernissaat Ineqarnermut Attaveqatigiinnermullu Naalakkersuisup, Karl Frederik Danielsenip aalajangiussimavaa.

- Borgmesterit piffinni assigiingitsuni unammilligaat pillugit naalaarusuppagut Naalakkersuisunit. Aamma Inatsisartut oqariartuutaat tusaallugit unneqqarilluta tamanna ingerlattariaqaratsigu, angallannermut naalakkersuisoq oqarpoq.

Angallannikkut kiffartuussinissamik isumaqatigiissutit ukiup tulliata naanerani atorunnaartussaassapput, 2021-miillu atuuttussat nutarterneqartussaallutik.

Angallannikkut pissutsit eqqartorlugit Naalakkersuisut borgmesterillu marsimi oqaloqatigiinnissaat aalajangiunneqarpoq.

- Kiffartuussinissamut isumaqatigiissutit qanoq isikkoqarnissaannik eqqartueqatigiinnissarput qilanaaralugu taanna saqqummiuppara, Karl Frederik Danielsen oqarpoq.

Borgmesterillumi siunissami angallannikkut pissutsit pitsaanerusinnaasoraat.

- Tassa naluneqanngitsutut arlaleriarluta maani Kujataanit aamma tusagassiutit aqqutigalugit, aammalu innuttaasut namminneq akuuffigisaminnik aaqqissukkaminnik pitsaangitsumik atugaqarnerup aaqqiissuteqarfigineqarnissaa oqariartuutigalugulu piumasarisarpaat. Taamaammat uani oqaloqataanissamut erinisuppugut. Ilumoorpoq pitsaanerusumik aaqqissuusisoqartariaqartoq, Kista P. Isaksen oqarpoq.

Tullianilu angallassinermut isumaqatigiissutissap qanoq ittuunissaa suli akissutissaqartinngikkaluarlugu angallannermut naalakkersuisoq tusarnaasalluni neriorsuutigaa.

- Naluuippara qanoq isikkoqassanersoq. Taamaammat neriorsuisinnaangilanga ima isikkoqaqqissaartumik ingerlassaagut, Karl Frederik Danielsen oqarpoq.