Disko Linep Kujataani angalanissamut pilersaarutini nittartakkaminit peerai

Angallavissat akillu kukkuneqarneri ilaatigut pissutigalugit Disko Linep pilersaarutini nittartakkaminit peersimavai.

Disko Linep sukumiinerusumik misissuereernerata, Kujataanilu sullitarilerumaakkami naammagittaalliornerisa kingunerisaanik, umiarsuaatileqatigiiffiup angalanissamut pilersaarutini kukkuneqartut paasisimagaa, Disko Linep pisortaata, Frederik Sandgreenip oqaatigaa.

- Nunat aqqi, angallavissat, ingerlaarfiit akillu kukkuneqartut paasivarput, Frederik Sandgreen KNR-imut taama oqarpoq.

- Angallavissat ingerlaarfissallu kukkuneqarnerat pissutigalugu akit aamma kukkuneqarput. Tamannaavorlu Kujataamiut naammagittaalliutigisaat, pisortaq oqarpoq.

Disko Linep, Kujataani aappaagumit assartuussilertussap, angalanissamut pilersaarutimini kukkunerit iluarsiiviginiarlugit sulissuteqarpoq marlunngornerullu ingerlanerani imaluunniit pingasunngornermi piareersimassanissaat naatsorsuutigalugu.

- Kujataani angalanissamut pilersaarusiorneq naatsorsuutigisatsinnit pisariuneruvoq. Suliarli ingerlapparput piaartumillu naammassinissaat neriuutigalutigu, Frederik Sandgreen taama oqarpoq, angalanissamullu pilersaarutini nutartikkani aamma kukkuneqarsinnaasoq erseqqissaatigalugu. Kukkuneqassappallu umiarsuaatileqatigiiffiup ingerlaavartumik iluarsisassagai, umiarsuaatileqatigiiffik ilisimatitsivoq.