Dieseli nukimmik ataavartumik taarserniarniaraat
![](/sites/default/files/styles/image_934x467/public/solpanel.jpg?itok=EjuA68GC)
Naalakkersuisut nukissiuutinik ataavartunik atuinerulernissaq suliniutigaat.
Nukissiuuteqarnermut naalakkersuisoqarfik, pinngortitaq pillugu nunarsuaq tamakkerlugu suliniaqatigiiffiup WWF-ip assigiimmik akeqartitsinissap avatangiisinut mingutsitsinerulernermik kinguneqarnissaanut ernummataanut taama akissuteqarput.
Naak suliffeqarfiit innuttaasullu innaallagissamut imermullu akiliutiminnit 150 millionit koruunit sipaarutigisalertussaagaluaraat nukissiuutinik ataavartunik suli pilersitsisoqarsinnaasoq, naalakkersuisoqarfik KNR-imut mailikkut allappoq.
AAMMA ATUARUK Akikillisaatigatik nukissiuutinik ataavartunik pilersitseqqaarlik
AAMMA ATUARUK Innuttaasut 56 millioninik sipaaruteqassapput
Nukissiorfiit nukimmit ataavartuneersumik assigiinngitsunik nukissiuusiorneq 2018-imi misiligarniaraat, naalakkersuisoqarfik allappoq.
Sumiiffinni assigiinngitsuni, nukissiuutiminnik siunissami qaninnerusumi ungasinnerusumilu nutarteriffigineqartussani, anorip sakkortussusiata uuttortarnissaa ilaatigut ukkatarineqassaaq.
Assigiimmik akeqartitsinikkut innaallagissiorfiit dieselitortuusut avatangiisinullu mingutsitseqisut atorneqarnerulernissaat ernummatigigini, WWF-imeersup Kaare Winther Hansenip KNR-imut sapaatit akunnerat kingulleq oqaatigaa.
Nunamili tamarmi innuttaasut sapinngisamik assigiimmik atugaqarnissaat, Naalakkersuisut qulakkeerusukkaat, taavalu aamma illoqarfinni mikinerni ilaqutariit imermut innaallagissamullu assigiimmik akeqartitsileqqinnikkut ukiumut 8000 koruunit tungaannoortut sipaarutigisalissagaat, Naalakkersuisoqarfiup erseqqissaatigaa.
AAMMA ATUARUK Demokraatit assigiimmik akeqartitsinissami akissaq ujartorpaat
AAMMA ATUARUK Assigiimmik akeqartitsiniarneq KANUNUPE-p nuannaarutigaa
Taassuma saniatigut Nukissiorfiit Igalikumi misiliutitut suliniuteqartut, naalakkersuisoqarfik allappoq. Tassa innaallagissiorfimmik pitsaanerusumik, akikinnerusumik minguinnerusumillu pilersitsinissaq suliniutigineqarmat.
Igalikumi innaallagissiorfik seqerngup qinnguaanik, anorisaammik batteriimillu dieselitortumit ingerlateqarpoq.
- Dieselimik maanna atuinerup sapinngisaq tamaat taarsersornissaa taavalu aamma innaallagissioriaatsit taakkua sisamat nunatsinni atugassaasut ataanni ingerlaqatigiissinnaanerisa misiligarnissaa siunertaavoq, naalakkersuisoqarfiup pisortaa Jørn Skov Nielsen KNR-imut allappoq.
Naalakkersuisut immikkoortumut pilersaarut nukissiuuteqarnermut tunngasoq tusarniaassutigileqqammerpaat,
illoqarfiillu erngup nukinganik peqartut innaallagissamik kiassarnermillu pisariaqartitaat erngup nukinganit eqqakkanit nukimmik nukimmillu ataavartumit tapertaqartumik isumagineqassasut anguniagaavoq.
Taamaammat Nuummi, Tasiilami, Qaqortumi, Narsami Sisimiunilu erngup nukinganik nukissiuutinik nukissiuutinilluunniit ataavartunik inerisaanissamik iluarsiissutaasinnaasut ukiuni aggersuni ujartorneqassasut, naalakkersuisoqarfik allappoq.