WWF: Akikillisaatigatik nukissiuutinik ataavartunik pilersitseqqaarlik
- Akigitinneqartoq 1 koruuni 60 øremut appartinneqassaaq. Tassalu affaanit minnermik akeqalissaaq. Tamannalu qularnanngitsumik innaallagissamik dieselitortumik atuipiloornerulernermik malitseqassaaq, pinngortitaq pillugu nunarsuaq tamakkerlugu suliniaqatigiiffimmi WWF-imeersoq Kaare Winther Hansen oqarpoq.
Nukissiuuteqarnermut naalakkersuisup imermut innaallagissamullu akinik iluarsartuussinissaq marlunngornermi saqqummiuppaa, tassalu innuttaasut innaallagissamut kilowatt-timemut 1 koruuni 60 ørinik imermullu kubikmeterimut 19 koruuninik akiliisalissapput.
AAMMA ATUARUK Innuttaasut 56 millioninik sipaaruteqassapput
AAMMA ATUARUK Nunarput silaannarmik kissatsitsiartunnginnerusoq
Tamannalu ingammik nunaqarfimmiunut pitsaasumik sunniuteqassaaq, nunaqarfimmiummi innaallagissamut imermullu akiliutiminnit 50 procentingajaat sipaarutigisinnaalissavaat.
Innaallagissiorfiilli dieselitortuusut atorneqarnerulernissaat, Kåre Winther Hansenip ernummatigaa. Dieselimmi ikumatinneranit aniasut peqqissutsimut avatangiisinullu ulorianaqisit, Hansen oqarpoq:
- Taamaaliornerlu taakkunani najugaqartut peqqissusaannut pinngortitamullu avatangiisumut navianartorsiortitsissaaq. Taassuma saniatigut CO2-mik aniatitsisoqarnerulissaaq takusinnaasakkami malillugit allanik aaqqiissutissarsisoqarsimanngilaq.
AAMMA ATUARUK Assigiimmik akeqartitsiniarneq KANUNUPE-p nuannaarutigaa
AAMMA ATUARUK Demokraatit assigiimmik akeqartitsinissami akissaq ujartorpaat
Naalakkersuisullu akinik appaanatik nunaqarfinni nukissiuutinik ataavartunik pilersitsisariaqarsorai:
- Akinik appaatigatik nunaqarfinni nukissiuutinik ataavartunik atuinissaat anguniarlugu siunissaq isigalugu pilersaarusiamik suliaqaqqaarsimasariaqaraluarput. Appaagunimmi, ikummatissanik avatangiisimik, mingutsitsisumik atuisoqarnerulissaaq, WWF-imeersoq Kaare Winther Hansen oqarpoq.
Naalakkersuisoqarfik innaallagissamik atuinerulernerup avatangiisimik sunniutigisinnaasai pillugit KNR-imit apeqquteqarfiginiarlugu attaviginiartaraluarparput sulili akissutissarsinngilagut.