Demokraatit assigiimmik akeqartitsinissami akissaq ujartorpaat

Naalakkersuisut innaallagissamut imermullu assigiimmik akeqartitsilerniarnerat taamaasiornikkullu innuttaasunik akiliutikinnerulersitsiniarnerat, Demokraatit nuannaarutigaat. 

Nukissiorfiilli Namminersorlutik Oqartussanut akiitsuminnik taarsersornerisa sivitsorneqarnissaannik, Naalakkersuisut siunniussaqarnerat Demokraatit apeqquserpaat: 

AAMMA ATUARUK Assigiimmik akeqartitsiniarneq KANUNUPE-p nuannaarutigaa

AAMMA ATUARUK Naalakkersuisut innaallagissamut imermullu assigiimmik akeqartitsineq eqquteqqikkusukkaat

- Siullermik oqaatigisinnaavara nunatsinni innuttaasut tamarmik sipaarutissaqalernerat nuannaajallannartorujussuusoq. Kisianni soorunalimi teknikkitaatigut apeqqutissaqarpugut, tassalu qanoq piviusunngortinneqarsinnaaneranik, Demokraatit siulittaasuat Randi Vestergaard Evaldsen oqarpoq.

Nukissiuuteqarnermut naalakkersuisup innaallagissamut imermullu akinut nutaanut siunnersuut marlunngornermi saqqummiuppaa.

Nunatsinni innuttaasut tamarmik akiliutaat malunnaatilimmik appartinneqarniarput, tassalu tamatta innaallagissamut kilowatt-timemut taamaallaat 1,60 koruuninik imermullu kubikmeterimut taamaallaat 19 koruuninik siunissami akiliisalissaagut.

Innuttaasut sipaaruteqarsinnaanerat pitsaasoq

- Innuttaasunut iluanaarutissaappat innuttaasullu akiliineroqqissanngippata taanna ajunngitsorujussuartut isigivarput aamma apeqquserneqarsinnaanngilaq, Randi Vestergaard Evaldsen oqarpoq.

Kisiannili:

- Una ernumassutigisinnaavarput siunissaq ungasinnerusoq aamma isigalugu akisunaarneqarsinnaanera, taannalu isumannaaqqaarusupparput misissuataaqqaarlugulu Demokraatininngaanniit.

Nukissiorfiit Namminersorlutik Oqartussanut akiitsuminnik taarsersuinerat sivitsorneqassasoq, Naalakkersuisut siunnersuutigaat. Nukissiorfiit taamaalillutik ukiuni 40-ni taarsersuinerminni ukiumut 70 millionit koruuninik sipaaruteqartassapput.

Tamannali Randi Vestergaard Evaldsenip isornartoqartippaa:

- Attartorneq sivitsorneqartussaavoq arlaatalu akilertussaava. Tassa nunatsinni innuttaasut 2050-imut tallineqarnera akilertussaavaat. 

Inuussutissarsiornermut, Suliffeqarnermut, Niuernermut Nukissiuuteqarnermullu naalakkersuisoqarfik naapertorlugu
Nukissiorfiit atukkaminik taarsersuineratigut isertitassatut annaasat tassungarpiaq sanaartugassanut aningaasaliissutit 80 millionit koruuninik ikilinerisigut nassaarineqassapput.