Naalakkersuisut innaallagissamut imermullu assigiimmik akeqartitsineq eqquteqqikkusukkaat
![](/sites/default/files/styles/image_934x467/public/article_images/hans_enoksen_0.jpg?itok=a5ISIeJ2)
Naalakkersuisut assigiimmik akeqartitsineq, Hans Enoksenip 2005-imi naalakkersuisunut siulittaasuunermini atorunnaarsitaa eqquteqqikkusuppaat. Maannalu utertinneqartussanngorpoq.
Marlunngornermi ullaap tungaani tusagassiortunik katersortitsinermi tamanna oqaatigaa. Nunatsinni innuttaasut tamarmik siunissami innaallagissamut kilowatt-timemut 1,60 koruuninik imermullu kubikmeterimut 19 koruuninik akiliisalissapput.
Naalakkersuisut naapertorlugit, inoqarfiit amerlanersaanni innaallagissamut kilowatt-timemut 3,25 koruuninik ullumikkut akiliisoqartarpoq. Innaallagissamut aki taamaalilluni affaannanngortinneqassaaq.
Imermut aki inoqatigiinnut amerlasuunut aamma appartinneqassaaq. Imermut kubikmeterimut amerlanerit ullumikkut 33,40 koruuninik akiliisarput, akili taanna 14 koruuninik appartinneqassaaq kubikmeterimut tamanut attuuttumik 19 koruuneqalissalluni.
AAMMA ATUARUK Akit 2005-imi assigiikkunnaarsinneqarneri Hans Enoksenip nammineq kukkussutigalugu oqaatigaa
Nunatsinni innuttaasut innaallagissamut imermullu katillugit 150 millionit koruuninik sipaaruteqassasut, naalakkersuisunit ilisimatitsissutigineqarpoq.
- Akinik iluarsartuussinermi matumani Naalakkersuisut aaqqiissutissamik tamanut iluaqutaasussamik angusaqarput, nukissiuuteqarnermut naalakkersuisoq, Hans Enoksen, taama oqarpoq.
Naalakkersuisut iluarsartuussinermut aningaasassat pisortani sipaaruteqarnikkut pissarsiariniarpaat. Namminersorlutimmi Oqartussat kommunillu imermut innaallagissamullu akit appartinneqarnerisigut 61 millionit koruuninik sipaaruteqassapput, taamaammat suliassaqarfinnut taakkununnga aningaasaliissutaasut aningaasat amerlaqataannik ikilineqassapput.
Aningaasallu sinneruttut Namminersorlutik Oqartussat Nukissiorfinnut taarsigassarsiat akilerneqarnissaannut piffiussaliussap marloriaammik - ukiunut 40-nut- sivitsorneratigut Naalakkersuisut pissarsiariniarpaat - taamaaliornikkut Nukissiorfiit ukiumut 70 millionit koruuninik sipaaruteqassaaq.
Namminersorlutik Oqartussat Nukissiorfiit atortulersuutaannut aningaasartuutaat 140 millionit koruuniusut 80 millionit koruuninik ikilineqassapput 60 millionit koruunit missaanniilerlutik, Nukissiorfiit allanngortiterinermut atatillugu aningaasalersugassanut nammineerluni akiliisinnaanngussammat.
Akinik iluarsartuussineq 2018-imut aningaasanut inatsisissatut siunnersuutip aappassaaneerneqarnissaanut allannguutissatut siunnersuutip ilagaa.
AAMMA ATUARUK Akit tamanut assigiillik