Akit 2005-imi assigiikkunnaarsinneqarneri Hans Enoksenip nammineq kukkussutigalugu oqaatigaa
![](/sites/default/files/styles/image_934x467/public/article_images/hans_enoksen_ny_0_0.jpg?itok=tHWJyztL)
Akit assigiikkunnaarneri nunaqarfimmiut aningaasaqarniarnerinut attuinerluppoq, tassa nunaqarfinni inuussutissat akii qaffarujussuarmata.
Akit assigiikkunnaarnerinik pilersitsineq kukkunerusoq, Hans Enoksenip maanna miserratiginngilaa. Taamaakkaluartoq Hans Enoksenip partiiliani nutaaq, Naleraq politikkikkut ilusilersuleruttorpaa, nunaqarfimmiut salliutillugit.
- Akit assigiikkunnaarnerat soorunami nunatsinni innuttaasut ilaannut eqquinerluppoq, ilarpassuinulli aningaasaqarnikkut iluaqusiilluni. 2007-imi tamanna misinnarsisoq takuarput, tassa akit assigiikkunnaarneri nunaqarfiit eqqarsaatigalugit tamanna torrallataanngitsuusoq. Tamannali erngerlugu aaqqiiffigaarput, soorlu nunaqarfinni innaallagiaqarneq imeqarnerlu tapiiffigineqaqqillutik, taamaalilluta nunaqarfinni ajornartorsiut aaqqiiffigalutigu.
Hans Enoksen oqarpoq ilanngullugulu eqqaasitissutigalugu, Naalakkersuisut siulittaasuunermi nalaani aningaasat nunaqarfinnut atugassiissutigineqartut killeqarmata ajornartorsiut pilersimasoq.
Hans Enoksen Naalakkersuisunut siulittaasuuvoq 2001-miit 2009 tikillugu.
Maannali partiiliornermini nunaqarfinni pissutsit allanngortinneqarnissaat neriorsuutigaa, ilaatigut nunaqarfinni maanna illuliassat 15-niinnaat Naalakkersuisunit pilersaarutaasut amerlineqarnissaat neriorsuutigalugu.
- Massakku takusinnaavarput nunaqarfinni missukutaatitsineq ukiorpassuarni qanoq annertutigisoq. Aatsaat ukioq mannamut, tassa 2014-imut aningaasaliisoqaqqippoq ukiuni kingullerni tallimani illuliassat eqqarsaatigalugit susoqanngereerluni, Hans Enoksen oqarpoq.
Nunaqarfinni illuliassat katitiinnarissat napparneqarnissaminnik utaqqiinnartut, nunaqarfimmiut akissaarunnerannik kinguneqartumik attorneqaratik nunamiiginnalersimasut ukiuni kingullerni ajornartorsiutaalersimaneri nunaqarfimmiunit qanoq iliuuseqarfigineqartariaqarneri ujartorneqartalerpoq. Tamannalu Hans Enoksenip aamma qanoq iliuuseqarfiginiarpaa.
- Nunaqarfimmiut ima aningaasarsiaqartiginngillat allaat illuliassat 500.000 koruuninik akillit pisiarisinnaallugit. Naalakkersuisuunerma nalaani aaqqissuussisarnerput tassalu 5 procenti tikillugu nunaqarfimmiut illuliorniartut akiliisarnerat atuuttussanngorteqqinneqarnissaa suliniutiginiarparput.
Partii Naleqqamik pilersitsiniartoq, Hans Enoksen taama oqarpoq. Akit assigiikkunnaarsinneqarput, 2005-imi januaarip aallaqqaataanit atuutilersumik.
Hans Enoksen Siumumi ilaasortaajunnaarpoq januaarip pingajuannit ukioq manna, ilaatigut Siumup aalisarnermut politikkianut isumaqataannginnini pissutigalugu.