Politikki Inuussutissarsiutit

Assigiimmik akeqartitsineq atuutileqqippoq: Innuttaasut 56 millioninik sipaaruteqassapput

Nunatsinni innuttaasut innaallagissamut imermullu malunnaatilimmik sipaaruteqartussanngorput. Inuussutissarsiuteqartut, pisortat sullissivii innuttaasullu nalinginnaasut innaallagissamut imermullu 150 millionit koruunit sipaarutigissavaat.

Allattoq Kenneth Elkjær

oktobarip 24-at 2017 10:41

Nutserisoq Simon Uldum -

Nukissiuuteqarnermut naalakkersuisup Hans Enoksenip imermut innaallagissamullu akinik iluarsartuussineq marlunngormat ullaap tungaani saqqummiuppaa.

Assigiimmik akeqartitsineq Hans Enoksenip nammineerluni 2005-imi atorunnaarsitaa eqquteqqinneqartussanngorpoq. Taamaaliortoqarneratigullu imermut kubikmeterimut 19 koruunit innaallagissamullu kilowatt-timemut 1,60 koruunit tamanut atuutsinneqalissapput.

AAMMA ATUARUK Naalakkersuisut innaallagissamut imermullu assigiimmik akeqartitsineq eqquteqqikkusukkaat

Naalakkersuisut naapertorlugit tamanna inoqutigiinnut ataasiakkaanut, aammalu inuussutissarsiuteqartunut, iluaqutaassaaq. Naatsorsuinermi, Hans Enoksenip tusagassiortunik katersortitsinermi saqqummiussaani takuneqarsinnaavoq Naalakkersuisut siulittuutigisaat eqquutissappat atuisut nalinginnaasut katillugit 56 millionit koruuninik sipaaruteqassasut.

Inuussutissarsiuteqartut 22 millionit koruunit missaannik sipaaruteqassapput, aalisakkanillu suliffissuaqarnermi 10 millionit koruuninik sipaaruteqartoqarluni. Namminersorlutik Oqartussat kommunillu innaallagissamut imermullu katillugit 61 millionit koruunit sipaassavaat.