WWF: Diesel atornagu erngup nukinga atorluarneqarli
Containerinik assartuutit - takornariartaatillu talissimasut innaallagiaqarniarlutik dieselimik atuingaatsiartarput.
Taamaannerallu pissutigalugu dieselip akui mikisunnguit kræfteqalernissamut, uummatikkut nappaateqalernissamut kiisalu aanaartoornissamut aarlerinarnerulersitsisinnaasut aniatinneqartarput.
Pinngortitaq pillugu nunarsuaq tamakkerlugu suliniaqatigiiffik naapertorlugu Nuummi talissimasunut avatangiisinut mingutsitsinnginnerusumik innaallagialersuutaasinnaasumik pilersitsisoqarnissaa sukkanerusinnaanngilaq.
- Akut mikisunnguit illoqarfitsinni aniatinneqartarput, dieselimillu innaallagiatortuni umiarsuarniittunut allamik ullumikkut aaqqiissutissaasinnaasoqarpoq, Pinngortitaq pillugu nunarsuaq tamakkerlugu suliniaqatigiiffiup WWF-ip nunatsinni allaffianeersoq Kaare Winther Hansen oqarpoq.
AAMMA ATUARUK Umiarsuit takornariartaatit Nuummi ikuallaaviup ukiumi ataatsimi ikuallaaneratut mingutsitsitigisartut
Erngup nukinga atorlugu
Aaqqiissutissatut allatut Nuummi nunamit sarfalersuummik pilersitsinikkut avatangiisinut mingutsitsinnginnerusumik umiarsuit sarfalersorneqarsinnaapput, taamaalilluni umiarsuarmi dieselimik sarfalersuutit qaminneqarsinnaasassallutik.
Illoqarfiit pingaarnersaannut umiarsuit takornariartaatit tikittartut amerliartornerat ilutigalugu CO2-mik, NOx-imit akut mikisunnguit kræfteqalersitsisinnaasut kiisalu uummatikkut nappaateqalernissamut aanaartoornissamullu aarlerinarnerulersitsisut aniatinneqartartut annertusiartorput.
- Dieselinik motorilinnik akut mikisunnguit aniatinneqartartut peqqissutsimut navianangaatsiarput, taakkulu inunnut anersaartornikkut toqqaannartumik sunniuteqartarput, tamannalu peqqinnissamut aarlerinaateqarneranut uppernarsaatissaqarpoq, Kaare Winther Hansen oqarpoq.
AAMMA ATUARUK Umiarsuit takornariartaatit Issittumi angalasarnerat navianaateqartoq
Mingutsitsinngitsumik aaqqiisoqartariaqartoq
RAL-ip kilisaatillu angisuut talingagaangamik dieseli atorlugu aamma sarfalersortarput.
Taamaammat umiarsuit nunatsinni umiarsualivinni talissimagaangamik nunamit sarfalersorneqartarnissaannik Naalakkersuisut piumasaqaateqalernissaat, pinngortitaq pillugu nunarsuaq tamakkerlugu suliniaqatigiiffiup kaammattuutigaa.
- Tamannalu Naalakkersuisut Issittumi uuliap kinertup atorneqarnerata inerteqqutaalernissaannik suleqataarusullutik nalunaaruteqarnerannut napertuuppoq. Tamanna akunik mikisunik mingutsitsisoqartarneranut aammali nunatta imartaatigut angalanermi HFO-mik atugaqarnermi aarlerinartumut tunngavoq, pinngortitaq pillugu nunarsuaq tamakkerlugu suliniaqatigiiffiup nunatsinni allaffianit, Kaare Winther Hansen oqarpoq.