Immikkut ilisimasallit: Umiarsuit takornariartaatit Issittumi angalasarnerat navianaateqartoq
Umiarsuup takornariartaatip Crystal Serenityip 1.700-nik ilaasoqarluni Sullualukkut aasaq manna angalaqqaarnerata kingorna taama mianersoqqussuteqarput.
Umiarsuaatileqatigiiffiup Chrystal Serenitymik piginnittup taamatut takornariartitseqqinniarluni pilersaarutigaa. Nittartagaq takeoff.dk taama allaaserisaqarpoq.
Sky News naapertorlugu, umiarsuarni ilaasunut isumannaallisaanermik qulakkeerinnittussamik avatangiisinillu illersuisussamik nakkutilliinermik eqqussisoqanngippat ajunaarnersuaqarsinnaanera umiarsuarnik takornariartitsinermik immikkut ilisimasallit ernumassutigaat.
Issittumi imaatigut angalaneq imaannaanngitsuusoq
Tero Vauraste, Finlandimiut umiarsuaatileqatigiiffianni Arctiami pisortap aviisimut oqaatigaa atortulersuutitigut amigaateqarneq pissutigalugu umiarsuaq ajornartorsiulissagaluarpat oqartussaasut iliuuseqarsinnaanerat killeqassasoq:
- Sulluallukkut sømilerpassuarnik angalanermi soqanngivippoq. Aamma qaammataasat atorlugit sumiissusersiornerup pitsaannginnerata imartap sikoqartup angallaviginera ajornarnerulersippaa. Siku 4-5 knobinik sukkatigisumik ingerlaarsinnaasarpoq, umiarsuillu qaammataasamit assilisanik akunnernik 10-20-nik pisoqaassusilinnik pissarseratarsinnaasarlutik, pisortaq Sky News-imut taama oqarpoq.
Norgemi umiarsuaatileqatigiiffimmi Hurtigrutenimi pisortaanerup Daniel Skjeldamip Sky Newsimut oqaatigaa avatangiisit innarlerumanagit malittarisassanik sukannernerusunik eqqussisoqartariaqartoq:
- Umiarsuarujussuit ajoquseraluarpata, tamanna avatangiisitigut ajunaarnersuarmik kinguneqarsinnaavoq, pisortaaneq oqarpoq.
Issittumi imaatigut angallannermut isumannaallisaanikkut malittarisassat nunarsuaq tamakkerlugu atuuttussat Naalagaaffiit Peqatigiit imaatigut angallannermut nunarsuaq tamakkerlugu suliniaqatigiiffiannit IMO-meersut, Polarkodemik taagorneqartut, 2017-imi atuutilersinneqassapput.
