Umiarsuaq takornariartaassuaq Sullualukkut angalalersoq

Umiarsuaq takornariartaat, Crystal Serenity, Alaskami Anchoragemit Sullualukkoornilu New Yorkimut angalanini marlunngorpat aallartissavaa. Naggueqatitta nunaqarfii aqqusaarneqassapput, ilaatigut Cambridge Bay (Iqaluktuuttiaq) tikinneqassalluni.

Umiarsuaq aamma Ilulissanut, Sisimiunut Nuummullu tikissaaq, angalaneralu ullunik 32-nik sivisussuseqassalluni.

Umiarsuaq inuulluarniutaavoq katillugit 1.028-nik ilaasoqassalluni, taakkulu tamarmik immikkut 300.000 koruunik akiliisimassapput, tassalu inummut ataatsimut ullormut 10.000 koruunit missaannik akeqarluni.

Angalanerup nuannerluinnarlunilu alianaalluinnarnissaa qularnanngilaq, amerlaqisulli aamma isumaqarput angalaneq ulorianartortaqartoq.

Takornarianulli ulorianartinneqanngilaq, avatangiisitigut politikkikkullu ernumanartoqartinneqarpoq.

Umiarsuaq taama angitigisoq siornatigut Sullualukkoorsimanngilaq, umiarsuaatileqatigiiffillu orsussamik mingutsitsinnginnerusumik atuineraraluartoq ajutoortoqarsinnaanera imaluunniit uuliakoortoqarsinnaanera suli periarfissaavoq.

Politikkikkullu Canadamut ulorianaateqarsinnaavoq, Canadammi USA-llu Sullualuk isumaqatigiinngissutigaat.

Canada isumaqarpoq Sullualuk Canadap imartaaniittoq, tamannalu aamma naggueqatigiit Inuit imartaq pillugu ilisimasatoqaannit taperserneqarpoq. USA-li nunallu allat isumaqarput imartaq nunanit tamalaanit ataatsimoorullugu pigineqartoq, taamaattumillu kikkulluunniit piumasut tassuuna angalasinnaasut.

Serenity Crystalsip angalanera umiarsuit allat Canadami inatsisit malinnagit Sullualukkut angalasalernerannik kinguneqaratarsinnaavoq. Tamannalu Canadami akueriumanngilaa.