Coronavirusimik tunillanneqarsimasut nunarsuaq tamakkerlugu amerliartoqqilertut
Coronavirusimik tunillanneqarsimasut nunarsuaq tamakkerlugu sapaatit-akunnerini kingullerni arfinilinni ikiliartorsimariarlutik, nunarsuaq tamakkerlugu sapaatit-akunnerata kingulliup ingerlanerani amerliartoqqilerput.
Naalagaaffiit Peqatigiit peqqissuunissaq pillugu suleqatigiiffiat, WHO, ataasinngornermi taama ilisimatitsivoq.
Tunillanneqarsimasut ataatsimut isigalugit amerliartoqqilernerat WHO-p qullersaata, Tedros Adhanom Ghebreyesusip, pakatsissutigaa uissuumminartinnaguli.
Coronap siaruatsaaliornissaa pillugu killilersuinerit qasukkaamineqanngikkallarnissaat taassuma kaammattuutigaa.
AAMMA ATUARUK New Zealandimiut coronavirusimik nunarsuarmi siaruatsaaliilluarnerpaasut
Coronavirusimut akiuussutissat siammarterneqaleruttorneranni coronavirus nunani tamalaani tuniluutilertoqqilerpoq, nunanili assigiinngitsuni killilersuinerit aamma qasukkaamineqaleruttorlutik.
- Nunat ilaat akiussutissat isumalluutigiinnarniarunikkit kukkussapput. Nappaatimmi siaruatsaaliornissaa iluatsissappat isumannaallisaanerit tunngaviulluinnartut atuutsinneqartariaqarput, WHO-p qullersaa Tedros Adhanom Ghebreyesus oqarpoq.
Nunat pisuunerit aamma appisaluuppai. Nunammi pisuunerit nunat allat eqqarsaatiginagit akiuussutissanik pisiortungaatsiarmata.
- Nunat ilaasa nunani allani utoqqaat akiuussuserneqarnissaat eqqarsaatiginagu nunaminni inuusuttunik peqqissunik akiuussutissiiniarnerunerat pakatsinarpoq, WHO-p qullersaa oqarpoq.