Ilisimatusarfimmit februaarip qaammataani isumasiuineq naapertorlugu Demokraatit Inatsisartunut qinersinermi 11,3 procentiinnarnit taaguunneqassaaq.Assi: Malik Brøns / KNR

Demokraatit qinersinissaq pillugu: Isumasiuinermi angusarissaanngikkaluarluta aarlerinngilagut

Isumasiuinermi Demokraatinut taasisartorpassuit allatut isumaqalersimagaluartut Demokraatit akisussaaffimmik tigusinissamut piareersimapput – aamma ajornartoqarnerani, Jens-Frederik Nielsen oqarpoq.

Demokraatit kommunimut Inatsisartunullu qinersinissamut qineqqusaarutissatik saqqummiuppaat.

Ilisimatusarfimmit februaarip qaammataani isumasiuineq naapertorlugu Demokraatit Inatsisartunut qinersinermi 11,3 procentiinnarnit taaguunneqassaaq.

2018-imi qinersisoqarnerani qinersisut 19,5 procentiinit taaguunneqarput.

Isumasiuineq uppernaruni partii Inatsisartuni qinigaaffimmi kingullermi arfinilinnik qinigaatitaqarfeqaraluartoq pingasuinnarnik qinigaatitaqarfeqassaaq.

AAMMA ATUARUK Nunatta Qitornaasa namminiilivinnissamut pilersaarut qineqqusaarutigigaat

Partiilli siulittaasuata qinersisoqarluarnissaa qularutiginngilaa.

- Naak partiimi nuiumasut marluk (Randi Vestergaard Evaldsen aamma Niels Thomsen aaqq.) ilaajunnaarnikuugaluartut aarlerinngilagut. Ataqatigiilluarpugut isummagullu qinersinissamut unammillissutigissagut, partiip siulittaasua, Jens-Frederik Nielsen oqarpoq.

Partiillumi inuit ataasiakkaat pisinnaatitaaffiinik aammali tamat naligiimmik periarfissaqarnerannik pingaartitsisup talerpilliusutut periaatsini nanginniarpaa. 

- Demokraatit partiitut pingaarnertut suliassaraat nunatta sapinngisamik namminersorfiunissaa qulakkiissallugu, Jens-Frederik Nielsen oqarpoq.

Innuttaasut angerlarsimanatik sulissasut

Naatsumik oqaatigalugu partiip nunatsinni inuuneq, najugaqarneq suliffeqarfimmillu ingerlatsineq ajornannginnerulersikkusullugulu akikinnerulersikkusuppaa.

Partiip akileraarut appartinniarpaa sulinermulluunniit ilanngaat qaffanniarlugu. Tamarmik atulersinneqanngikkunik.

Sulinermut ilanngaat Demokraatit ukiuni kingullermi pingasuni sulissutigaat.

Ilanngaat innuttaasunut sulerusutsitsilissaaq tamannalu ukiumut akileraarutanngitsumik 4.100 koruunit tikillugit atugassaqarnerulersitsissalluni. Demokraatit aningaasat taakku qaffasinnerulersikkusuppaat.

 

 

- Taanna angerlarsimaannarnerminngaanniit sulerusunnerulersitsissaaq, Jens-Frederik Nielsen oqarpoq.

Demokraatit ingerlatsiviit akileraarutaasa 30-mit 25 procentimut apparneqarnissaanut peqataapput. Taanalu Demokraatit aalajangiisussaagaluarunik 20 procentimut apparneqassaaq.

Sikaritsit sunoorsinik taarserlugit

Demokraatit peqqinnissamut susassaqarfimmi timersorneq pinaveersaartitsinerlu ukkatarineqarnerulersikkusuppaa. Partiip pinaveersaartitsinermut timersornermullu attuumassuteqartut tamarmik naalakkersuisoqarfimmi ataatsimi ataatsimoortikkusuppai. Sikaritsinullu taarsiullugu ”peqqinnarnerusunik” periarfissiisoqassalluni.

- Sunoorsit peqqissutsimut pitsaasuunngillat, sikaratsiniilli pujortagassanillu nioqqutinit allanit pitsaanerujussuupput. Sikaratsit saniatigut qinigassanut allanut, soorlu assersuutigalugu sunoorsinut, akitsuutit taamaammat apparneqartariaqarput, partii oqarpoq.

AAMMA ATUARUK Asaneq, isumaqatigiinngiffiit qinersinerlu

Tarnip pissusianik ilisimasalinnit allaanerusunik aamma periarfissaqassaaq. Assersuutigalugu ilaqutariinnut siunnersuisut, Demokraatit oqarput.

Partii nuna tamakkerlugu ilaqutariinnut siunnersuisoqarfimmik pilersitserusuppoq, tassa illoqarfinni nunaqarfinnilu tamani ilaqutariinnut siunnersuisut angajoqqaat avinnissaannik pinngitsoortitsisussat.

 

 

- Ilaqutariinnik siunnersuisoq taamaalilluni ilaqautariinnik pissarsiariuminartuussaaq pingaarnertullu siunertarissavaa ilaqutariit unammilligassaat pillugit siunnersuinissaq ilitsersuinissarlu, inuiaqatigiit ilaqutariinnik nukittuunik ataqatigiilluarnermillu toqqammavissaqartinniassagatsigit, Nivi Olsen oqarpoq.

Demokraatit Inatsisartunut 17-inik qinigassanngortitaqarallarput, qinersinissamullu qinigassanngortissinnaasunik allanik oqaloqateqarlutik Nivi Olsenip oqaatigaa.

Partii kommuninut qinersinissamut kommunini sisamani qinigassanngortitaqarpoq. Kommune Kujallermi Demokraatit sinnerlugit qinigassanngortittoqanngilaq.

- Nunatta kujataani immikkoortortaqarfeqarpugut, qinigassanngortittoqanngilarli, Jens-Frederik Nielsen oqarpoq.

Nannumik assiliisoq © Vilhelm Lynge Hard

TV, radio: Qinersisartunik ataatsimiititsinerit

INATSISARTUNUT QINERSINEQ #IQ2021

Illoqarfinni assigiinngitsuni qinersisartunik ataatsimiititsinerit tv-kkut radiukkullu aallakaatilerpagut.

Sumiiffiit ornillugit imaluunniit Facebookimi quppernitsinni KNR-imi Qinersinermi apeqquteqarnissamut periarfissaqarputit:

facebook.com/qinersineq

Pilersaarutit uani takukkit