Asaneq, isumaqatigiinngiffiit qinersinerlu
Taamatullu inooqatigiinneq nukittorsaataasoq, taakku oqaluttuarput.
- Soorunalimi politikimi eqqartuissagaangatta isumaqatigiittarpugut, aamma isumaqatigiinneq ajorpugut. Kisianni aappariittut ajornartorsiutigineq ajorparput, nakooqqutigiinnarunarparpulluunniit taamatut inuugatta, Niels Davidsen, Inuit Ataqatigiinneersoq, oqarpoq. Nulia Demokraatit tunuliaqutaralugit qinigassanngortittoq ima itisiliivoq:
- Isummat assigiinngitsut, kisianni imminnut naapitsikkiartuaarnissaa isumaqatigiilernissatta tungaanut taanna nukittorsaatitut immaqa nukittoqqutitullu isigivarput.
Aappartiit aatsaat siullermeerlutik qineqqusaalinngillat - taakku 2017-imi aamma qineqqusaarput, taamani aamma Inuit Ataqatigiit Demokraatillu sinnerlugit. Assi: Nammineq assiutigisaq, Lena Ravn Davidsenimit
Akileraarutit pillugit isumaqatigiinngitsut
Nuliariilli partiimi tunuliaqutaat aallaavigalugu ilaatigut qulequttamik aalajangersimasumik naaperiuteqarlutik isumaqatigiiffeqalersinnaanngillat, tassalu pissakinnerusut ikiorniarlugit pissaqarnerusut akileraaruteqarnerusarnissaat.
- Aamma uunga pisinnaasarpugut; uanga ima isumaqarpunga illit imatut isumaqarputit, tassaniikkallarniarli, Lena Ravn Davidsen KNR-imut oqarpoq.
AAMMA ATUARUK Kommunimut qinersineq: Avannaata Kommuniani qinigassanngortittut
Nuliariit Davidsenikkut ukioq manna ukiunik 25-nik katiffissiussapput, pingasunillu meeraqarlutik. Angerlarsimaffimmi politikikkut eqqartuitillutik paniata anaanani isumaqatigikkajunnerullugu, ernera nukarliup ataatani isumaqatigikkajunnerusaraa, nuliariit oqaluttuarput.
- Panitta anaanani illersukanneraa ernitta nukarliup ataatani taamaalitillugit aamma taakku eqqartueqatigisarpagut, meeqqat politikimut paasitinniarsaralugit sooq politikimi soqutigisaqassalluni aamma taama pisariaqartigisoq, Niels Davidsen oqarpoq.
Aappariit kommunimut 2017-imi qinersisoqarmat siullermeerluitk sassarput, taamanikkullu Lena Ravn Davidsen qinigaavoq.
Tamarmik tamatumuuna qinigassanersut apriilip ulluisa arfernani paasinarsiumaarpoq.
Arnat 16-it angutillu 44-t
Avannaata Kommuniani qinigassanngortittut 60-iupput. 2017-imi kommunimut qinersisoqarneranit taakku qulingiluanik ikinnerupput.
Qinigassanngortittunit 60-init 44-t angutaapput, arnallu 16-iullutik.
Siumumit 27-t qinigassanngortipput, Inuit Ataqatigiinnit aqqanillit, Naleqqamit qulit, Atassummit arfinillit, Demokraatinit tallimat, Nunatta Qitornaanit ataaseq.