Sara Olsvig: Demokraatit oqaasii imminut assortuupput
- Demokraatit ikinnerussuteqarluni naalakkersuisunut tapersersuerusupput, politikkikkut patajaatsumik aqutsisoqarnissaa tunngavilersuutigaat. Uangali isumaqarpunga taama aaqqissuussiniarneq akerlianik patajaatsuunngitsoq. Suliamit suliamut, ataatsimiinnermit ataatsimiinnermut, ataatsimiititaliani ataatsimiinnerni, Inatsisartullu ataatsimiittarfianni ataatsimiinnerni naalakkersuisut avaqqullugit amerlanerussusiisoqartarsinnaavoq. Politikkikkut suliaq taamaalinikkut patajaatsuuneq ajorpoq, innuttaasunullu tamanna toqqissisimananngilaq, Inuit Ataqatigiit siulittaasuat Sara Olsvig oqarpoq.
AAMMA ATUARUK Demokraatit naalakkersuisooqatigiinnissamut itigartitsipput Kielsenili tapersersorlugu
Siumumili avissaartuuttoqarneranik Niels Thomsenip oqarnera Sara Olsvigip isumaqatigaa:
- Siumumik suleqateqarnissarput takorloorsinnaanngilara, tunuliaquttaminni aqutsisuinilu eqqissiviinneqarpallaaqaaq. Naalakkersuisoqatigiiliornissamut periarfissinneqassagutta piareersimavugut, amerlanerussuteqarsinnaasariaqarpugulli, Sara Olsvig oqarpoq.
AAMMA ATUARUK Naalakkersuisut ikinnerussuteqartut Partii Naleqqap tapersersornianngikkai
Inatsisartunut qaammatit tallimaannaat matuma siornatigut qinersisoqareersorlu qinersisoqaqqinnissaa, Sara Olsvig Niels Thomsenitulli isumaqarpoq:
- Qinersisoqaqqinnissaa orniginartinngilara. Innuttaasut qaammatit arfinillit matuma siornatigut qinersereersullu maannangaaq qinerseqqittariaqanngillat, Sara Olsvig oqarpoq.
Inatsisartut sapaatip-akunnerata tulliani pingasunngorpat ataatsimiilerpata Kim Kielsenimut tatiginninnginnermik takutitsiniassanerlutik Inuit Ataqatigiit suli aalajanginngilaat.
