Demokraatit benzinasiniutissamut suliamut nalunaarusiaq utaqqimaarniaraat
- Uunnga pisumut naqissuserusuppara revisionsudvalgi suliamik suliassarisaminik ingerlatsimmat, taamaattumillu uagut nalunaarusiamik suli pinnginnatta, tamannalu peqqutigalugu uani pisumi unioqqutitsisoqarsimanersoq massakkuugallartoq oqaatigisinnaanngilarput. Tamanna nalunaarusiaq tigugutsigu oqaatigisinnaalissavarput, Niels Thomsen oqarpoq.
Kortip benzinasiniutissap Doris J. Jensenimut naalakkersuisuunerminut atatillugu tunniunneqartup atornerlunneqarneranut suliaq maanna allaaserineqartupilussuuvoq.
AAMMA ATUARUK Kortimik benzinasiniutissamik atornerluisoqarsimanera Kielsenip oqaaseqarfigerusunngikkallaraa
Doris J. Jensenip kortimi atornerlunneqarnera politiinut nammineerluni ukiakkut 2017-imi nalunaarutigaa, kukkunersiusartullu Deloittekkut nalunaarusialiornissaannik nammineerluni suliakkillugit.
Suliaq Inatsisartut kukkunersiuinermut ataatsimiititaliaannit 2017-imi aallartinneqarpoq, suliarli ukioq manna qinersisoqarneranit unikkallartinneqarluni.
Kukkunersiuinermut ataatsimiititaliap isumaliutissiissutaa Inatsisartunit novembarip ulluisa 27-anni saqqummiunneqassaaq.
AAMMA ATUARUK Korti benzinasiniutissaq angallatip orsersorneqarnissaanut atorneqarpoq
Demokraatillu suliaq naammassitinnagu oqaaseqarusunngikkaluartut Niels Thomsen ima oqarpoq:
- Nangaassutigineqassanngilaq, inuiaqatigiit pigisaannik atornerluineq Demokraatinit akuerinnginnatsigu. Aamma tamannarpiaq ilaatigut peqqutaavoq, Demokraatit taamanikkut pilersinneqarnerannut. Taamaattumik atornerluisoqarsimappat taanna akueriunnanngilarput, Demokraatit siulittaasuat, Niels Thomsen, oqarpoq.
AAMMA ATUARUK Kortimik benzinamik pisiutissamik atornerluisoqarsimaneranik tusatsiakkat Qujaukitsup eqqunnginnerarpai
Kim Kielsenip kukkunersiuinermut ataatsimiititaliamit isumaliutissiissut utaqqimaaqqaarniaraa, Naalakkersuisut siulittaasuata allattaa KNR-imut paasissutissiivoq.
