Kortimik benzinamik pisiutissamik atornerluisoqarsimaneranik tusatsiakkat Qujaukitsup eqqunnginnerarpai
- Naalakkersuisuni ilaasortap umiatsiaaqqami benzinamik orsernissaanut kortimik benzinasiutissamik atornerluisimaneranik tusatsiakkat Suleqatigiissitsisunit tusarpagut.
Tillie Martinussen Naalakkersuisunut apeqquteqarnermini oktobarip aallaqqaataani taama allappoq. Partiimit tusatsiakkat ilumoornersut ilumuunnginnersulluunniit paaserusuppaa.
Aningaasaqarnermullu naalakkersuisup tusatsiakkat akissutimini ilumuunnginnerarpai.
Tillie Martinussenip apeqquteqaatimini paaserusuppaa Naalakkersuisuni ilaasortat pisortat aningaasaataannik atornerluisimanerannut sulianik ingerlasoqarnersoq. Aamma Naalakkersuisuni ilaasortat atornerluisimanerannik misissuisoqarnersoq paaserusuppaa. Tamakkuli tamaasa aningaasaqarnermut naalakkersuisup eqqunnginnerarpai.
Doris J. Jensen atornerluisoqarsimaneranik nalunaarutiginnittoq
Akissuteqaat paasissutissanik peqqissutsimut, isumaginninnermut inatsisinillu atuutitsinermut naalakkersuisumit Doris J. Jensenimeersunik aamma ilaqarpoq.
Taassuma paasissutissiissutigaa inummik kortiminik benzinasiutissamik Namminersorlutik Oqartussanit pissarsiarisimasaminik atornerluisimasumik 2017-imi nalunaarutiginnissimalluni.
- Pissutsit taamaannerat paasigakku kukkunersiuisartut suliffeqarfiat Deloitte ingerlaannaq qinnuigaara suliaq avataanit misissoqqullugu. Tassunga atatillugu naapertuutinngitsumik atorneqartut 6.855,45 kr. -t missaanniittut Deloittemit
oqaatigineqarpoq. Tamatuma kingunitsianngua inummit kortimik naapertuutinngitsumik atuisimanerminik nassueruteqartumit aningaasat taakku utertillugit akilerneqarput. IIanngullugu oqaatigineqarsinnaavoq inuk uanga inoqutima avataaniittoq pineqarmat, Vittus Qujaukitsumut akissutimini taama allappoq.
Ilanngullugulu paasissutissiissutigaa Kukkunersiuinermut ataatsimiititaliaq, Naalakkersuisut Naalakkersuisullu siulittaasuat atornerluisoqarsimaneranik ilisimatissimallugit. Doris J. Jensen akissutimini allappoq politiinit kingorna ilisimatinneqarsimalluni inummut unnerluutigineqartumut suliaq taamaatiinnarneqarsimasoq.