Korti benzinasiniutissaq angallatip orsersorneqarnissaanut atorneqarpoq

Korti benzinasiniutissatut atorneqartartoq, Doris J. Jensenimut taamanikkut tunniunneqarsimasoq, angallatip orsersorneqarnissaanut atorneqarsimavoq. Sermitsiaq.AG taama allaaserisaqarpoq.
Assi © : KNR
oktobarip 13-at 2018 12:35
Nutserisoq Mads Lynge

Kortimik benzinasiniutissamik atornerluisoqarsimanersoq, kukkunersiuisartut Deloittemeersut misissussagaat,
Ilinniartitaanermut, Kultureqarnermut, Ilisimatusarnermut Ilageeeqarnermullu taamanikkut naalakkersuisup Doris J. Jensenip qinnuigisimavai. Sermitsiaq.AG-p allagaatinik paasitinneqarsinnaatitaaneq aqqutigalugu tamanna allaaseraa.

Inummik kortiminik benzinasiniutissamik Namminersorlutik Oqartussanit pissarsiarisimassaminik atornerluisimasumik 2017 -imi nalunaarutiginnissimanini, Doris J. Jensenip qanittukkut oqaatigaa.

Deloittep nalunaarusiaa naapertorlugu korti pineqartoq, kortillu kodea, Doris J. Jensenip pisortatigoortumik biiliniissimapput, Doris J. Jensenilu naapertorlugu inuk inoqutaasa avataaniittoq kortimik naapertuutinngitsumik atuisimavoq.

Inuup atuisup aningaasat naapertuutinngitsumik atorneqartut katillugit 6855,45 koruunit missaanniittut utertillugit akilersimavai. Aningaasat pineqartut umiatsiat orsersorneqartarfianni atorneqarsimasut Deloittep nalunaarusiami oqaatigaa.

AAMMA ATUARUK Kortimik benzinamik pisiutissamik atornerluisoqarsimaneranik tusatsiakkat Qujaukitsup eqqunnginnerarpai

Aningaasanik atornerluisimaneq annertunerusinnaavoq

Aningaasanillu atornerluisimaneq annertunerusinnaasoq nalunaarusiami aamma oqaatigineqarpoq:

- Pisiat allagartaat qimerlualaaraanni takuneqarsinnaavoq biilit orsersorneqartarfianni orsersortoqartarsimasoq, benziina 75 liiteri tassani orsersorneqarsimasoq, piffissanilu allani 25 liiteri ataallugit orsersortoqartarsimasoq, Bo Colbe, kukkunersiuisoq, pisortanit akuerisaq, Deloittemeersoq, Sermitsiaq.AG-mut oqarpoq.

AAMMA ATUARUK Kortimik benzinamik pisiutissamik atornerluisoqarsimaneranik tusatsiakkat Qujaukitsup eqqunnginnerarpai

Doris J. Jensenip pisortatigoortumik biiliisa annerpaamik 60 liiterinik orsersorneqarsinnaasoq, Deloittep ilisimatitsissutigaa.

Naalakkersuisuni ilaasortat arlaat kortimik benzinasiniutissamik atornerluisimanersoq, Tillie Martinussenip, Suleqatigiissitsisuneersup, §37 naapertorlugu apeqquteqaatigaa, suliarlu tassani aallartilluni.

Inummut unnerluutigineqartumut suliaq taamaatiinnarneqarpoq

Aningaasaqarnermut naalakkersuisup Vittus Qujaukitsup, akissutimini taamaattoqarsimannginnerarpaa. Peqqissutsimut, isumaginninnermut inatsisinillu atuutsitsinermut naalakkersuisoq Doris J. Jensen, Vittus Qujaukitsup akissuteqaataani paasissutissanik taamaattoq ilanngussaqarpoq.

- Ilanngullugu oqaatigineqarsinnaavoq inuk uanga inoqutima avataaniittoq pineqarmat, Doris J. Jensen oqarpoq.

Kukkunersiuinermut Ataatsimiititaliaq, Nalakkersuisut Naalakkersuisullu siulittaasuat atornerluisoqarsimaneranik ilisimatissimallugit, Doris J. Jensenip ilisimatitsissutigaa, politiiniillu kingorna ilisimatinneqarsimalluni inummut unnerluutigineqartumut suliaq taamaatiinnarneqarsimasoq.

Doris J. Jensenip KNR-imut ilisimatitsissutigaa paasissutissat suliamut tunngasut Naalakkersuisunut, kukkunersiuisartunut Deloittemut politiinullu tunniussimallugit, Inatsisartullu kukkunersiuinermut suliamut atatillugu aalajangiinissaa pissutigalugu oqaaseqarusunngikkallarluni.

Naalakkersuisut siulittaasuat Kim Kielsen suliaq pillugu oqaaseqarumanngikkallarpoq. Doris J. Jensen kortimik benzinasiniutissamik atornerluisoqarsimaneranut atatillugu pissusissamisoortumik qisuariaateqarsimasoq, Kim Kielsen isumaqarpoq. Taassuma allattaa taama ilisimatitsissuteqarpoq. Inatsisartut kukkunersiuinermut ataatsimiititaliaata suliamut atatillugu aalajangernissaa Kim Kielsenip utaqqimaaqqaarniarpaa.