Kortimik benzinasiniutissamik atornerluisoqarsimanera Kielsenip oqaaseqarfigerusunngikkallaraa
Kukkunersiuinermut Ataatsimiititaliaq, Nalakkersuisut Naalakkersuisullu siulittaasuat atornerluisoqarsimaneranik ilisimatissimallugit, Doris J. Jensenip ilisimatitsissutigaa. Inatsisartulli kukkunersiuinermut ataatsimiititaliaata aalajangernissaa pillugu suliamut tunngasunik oqaaseqarusunngikkallarluni.
AAMMA ATUARUK Korti benzinasiniutissaq angallatip orsersorneqarnissaanut atorneqarpoq
Naalakkersuisut siulittaasuat Kim Kielsen suliaq pillugu oqaaseqarumanngikkallarpoq. Doris J. Jensen kortimik benzinasiniutissamik atornerluisoqarsimaneranut atatillugu pissusissamisoortumik qisuariaateqarsimasoq, Kim Kielsen isumaqarpoq. Inatsisartut kukkunersiuinermut ataatsimiititaliaata suliamut atatillugu aalajangernissaa Kim Kielsenip utaqqimaaqqaarniarpaa.
Sermitsiaq.AG-p allagaatinik paasitinneqarsinnaatitaaneq aqqutigalugu suliamut tunngasumik allaaserisaqarpoq, Deloittellu nalunaarusiaani ilaatigut kaammattuutigineqarpoq kortimik akisussaassuseqarnerusumik atuisoqartariaqartoq.
- Sipaaruteqarfiunerpaasumik akisussaassuseqarnerusumillu kortimik atuisoqarnissaa kaammattuutigineqarpoq, aningaasaliissutimmi akileraarutineersut akisussaassuseqarnerusumik atorneqartariaqarput, kortimmi paarilluarneqarluni atorneqarnissaa pisariaqarpoq, Bo Colbe ilaatigut allappoq.
Kortimillu atornerluisoqarsimaneranik misissuisoqarnissaanut Doris J. Jensenip Deloittemut qinnuteqarsimanera pissusissamisoortoq Kim Kielsen isumaqarpoq.
Inuup inoqutimi avataanniittup korti atornerlussimaneraa politiit misissuiffigaat, inummulli unnerluutigineqartumut suliaq taamaatiinnarneqarsimavoq.
